ڪراچي(ويب ڊيسڪ) پاڪستان اسٽاڪ ايڪسچينج ۾ سيڙپڪارن جو اعتماد بحال ٿيڻ بعد رڪارڊ تي رڪارڊ قائم ٿيڻ لڳا. ڪاروباري هفتي جي پنجين ۽ آخري ڏينهن تي به مارڪيٽ جي شروعات تي تيزي ڏسڻ ۾ آئي، جنهن سبب 100 انڊيڪس تاريخي سطح تي پهچي ويو.
ڪاروبار دوران 1100 کان وڌيڪ پوائنٽن جي واڌ سان 100 انڊيڪس 1 لک 69 هزار 663 پوائنٽن جي بلند ترين سطح تي ٽريڊ ٿيو، جڏهن ته پهرين سيشن جي پڄاڻي 812 پوائنٽن جي واڌ سان 1 لک 69 هزار 301 پوائنٽن تي ٿي.
مارڪيٽ جي پهرين ٽريڊنگ سيشن دوران 93 ڪروڙ شيئرز جو ڪاروبار ٿيو، جنهن جو مالي حجم 42 ارب رپيا رهيو.
سيڙپڪارن جي دلچسپي خاص طور تي آٽو موبائل اسمبلرز، سيمينٽ، ڪمرشل بئنڪ، فرٽيلائيزر، آئل اينڊ گئس ايڪسپلوريش، او ايم سز، بجلي جي پيداوار ۽ ريفائنري شعبي ۾ ڏسڻ ۾ آئي. انڊيڪس ۾ وزن رکندڙ اسٽاڪ جهڙوڪ حبڪو، او جي ڊي سي، پي او ايل، ايس اين جي پي ايل، ايس ايس جي سي، ڊي جي ڪي سي ۽ آءِ اين ڊي يو مثبت زون ۾ ٽريڊ ٿيا.
ياد رهي ته گذريل ڪاروباري ڏينهن جي پڄاڻي تي 100 انڊيڪس 2849 پوائنٽن جي واڌ سان 1 لک 68 هزار 489 پوائنٽن تي بند ٿيو هو.
