راولپنڊي (ويب ڊيسڪ) پاڪ فوج طرفان ضلع اورڪزئي ۾ خفيه اطلاع تي ڪامياب آپريشن ڪندي ڀارتي سرپرستي هيٺ هلندڙ 19 دهشتگردن کي انجام تائين پهچايو ويو، جڏهن ته فائرنگ دوران ليفٽيننٽ ڪرنل جنيد عارف، ميجر طيب راحت سميت 11 بهادر جوان وطن تي قربان ٿي ويا.
آءِ ايس پي آر موجب، 7 ۽ 8 آڪٽوبر جي رات، سڪيورٽي فورسز طرفان اورڪزئي ضلعي ۾ خفيه اطلاع تي آپريشن ڪيو ويو، جتي فتنه الخوارج جي موجودگي جي اطلاع هئي، جيڪي ڀارتي مدد سان سرگرم هئا.
آپريشن دوران پاڪ فوج جي بروقت ۽ مؤثر ڪارروائي سان 19 دهشتگرد مارجي ويا، جڏهن ته ليفٽيننٽ ڪرنل جنيد عارف (عمر 39 سال) ۽ ميجر طيب راحت (عمر 33 سال)، ٻئي راولپنڊي جا رهواسي، دشمن سان وڙهندي شهيد ٿي ويا.
شهادت ماڻيندڙن ۾ نائب صوبيدار اعظم گل (خيبر)، نائڪ عادل حسين (ڪرم)، نائڪ گل امير (ٽانڪ)، لانس نائڪ شير خان (مردان)، لانس نائڪ طالش فراز (مانسهره)، لانس نائڪ ارشاد حسين (ڪرم)، سپاهي طفيل خان (ملاکنڊ)، سپاهي عاقب علي (صوابي) ۽ سپاهي محمد زاهد (ٽانڪ) شامل آهن.
سڪيورٽي فورسز طرفان علائقي ۾ ڪليئرنس ۽ سينيٽائيزيشن آپريشن جاري آهي ته جيئن باقي بچيل دهشتگردن کي به انجام تائين پهچايو وڃي.
آءِ ايس پي آر جو چوڻ آهي ته پاڪ فوج ملڪ مان ڀارتي اسپانسرڊ دهشتگردي جي لعنت جي خاتمي لاءِ پرعزم آهي، ۽ جوانن جون اهڙيون قربانيون قومي عزم کي وڌيڪ مضبوط ڪن ٿيون.
وزيراعظم ۽ وفاقي گهرو وزير جا پيغام
وزيراعظم محمد شهباز شريف آپريشن جي ڪاميابي تي پاڪ فوج کي خراج تحسين پيش ڪندي شهيدن جي قرباني تي افسوس جو اظهار ڪيو. هن شهيدن لاءِ دعاءِ مغفرت ۽ وارثن لاءِ صبر جي دعا ڪئي.
وزيراعظم چيو ته پاڪ فوج جي نڊر سپوتن جون قربانيون هرگز رائيگان نه وينديون، ڀارتي حمايت يافته دهشتگردن جا ناپاڪ ارادا ناڪام ڪيا ويندا. حڪومت ملڪ مان دهشتگردي جي مڪمل خاتمي لاءِ پرعزم آهي.
وفاقي گهرو وزير محسن نقوي به آپريشن جي ڪاميابي تي پاڪ فوج جي بهادري کي ساراهيندي، شهيد آفيسرن ۽ جوانن کي خراج عقيدت پيش ڪيو. هن زخمي جوانن جي جلد صحتيابي لاءِ دعا ڪئي.
محسن نقوي چيو ته شهيدن پنهنجي قيمتي جانن جي قرباني ڏئي ڀارتي اسپانسرڊ دهشتگردن جي سازشن کي ناڪام بڻايو. انهن جون قربانيون ناقابل فراموش آهن، ۽ قوم هميشه انهن جي مقروض رهندي.
گهرو وزير جو چوڻ هو ته شهيدن پنهنجي رت سان وطن سان محبت ۽ وفاداري جي تاريخ رقم ڪئي، ۽ انهن جو هر قطرو دهشتگردي خلاف قومي عزم جو ترجمان آهي. قوم شهيدن جي بهادر خاندانن کي سلام پيش ڪري ٿي.
