لنڊن: اڳوڻي آءِ ايس آءِ بريگيڊيئر (ر) راشد نصير يوٽيوب وڊيوز ذريعي لڳايل الزامن خلاف برطانوي عدالت مان تاريخي ڪاميابي حاصل ڪري ورتي. لنڊن هاءِ ڪورٽ يوٽيوب شخصيت ۽ اڳوڻي ميجر عادل راجا کي بدنام ڪندڙ ۽ بي بنياد الزامن تي ڏوهاري قرار ڏيندي، کيس 3.5 لک پائونڊ (تقريباً 13 ڪروڙ پاڪستاني رپيا) جي رقم هرجاني ۽ عدالتي خرچن جي مد ۾ ادا ڪرڻ جو حڪم ڏنو.
جج رچرڊ اسپيئرمين KC پنهنجي فيصلي ۾ واضح ڪيو ته عادل راجا طرفان سوشل ميڊيا تي شايع ڪيل 9 اشاعتون سخت توهين آميز هيون، جن سان راشد نصير جي شهرت کي نقصان پهتو. عدالت عادل راجا کي حڪم ڏنو ته هو پنهنجي سڀني ميڊيا پليٽفارمن تي فيصلي جو خلاصو شايع ڪري، جنهن ۾ اعتراف هجي ته الزامن بي بنياد ۽ توهين آميز هئا، ۽ هو مستقبل ۾ اهڙا الزام نه ورجائيندو.
عدالت دوران عادل راجا طرفان پيش ڪيل گواهن—شاهين صهبايي، شهزاد اڪبر ۽ سيد اڪبر حسين—مان ڪنهن به راشد نصير جي مبينا ڪرپشن بابت ڄاڻ جو دعويٰ نه ڪيو. جج چيو ته گواهن جي شاهديون نه صرف غير لاڳاپيل هيون، پر هڪ ٻئي سان به مطابقت نه رکيون.
عدالت ارشد شريف جي قتل بابت عادل راجا جي دعويٰ کي به رد ڪندي چيو ته فئڪٽ فائنڊنگ رپورٽ ۾ آءِ ايس آءِ کي قصوروار نه قرار ڏنو ويو، ۽ عادل راجا پنهنجن الزامن جي تصديق لاءِ ڪو به معتبر ثبوت پيش نه ڪري سگهيو.
فيصلي کانپوءِ بريگيڊيئر (ر) راشد نصير ردعمل ڏيندي چيو، “هي فيصلو ياد ڏياريندڙ آهي ته پاڪستان هجي يا ٻيو ملڪ، انصاف هميشه ڪوڙ تي غالب ايندو. هي رڳو منهنجي نه، پر هر ان شخص جي فتح آهي، جنهن کي بدنيت ماڻهن نشانو بڻايو.”
عدالت جي ٻڌڻي 22 کان 27 جون تائين جاري رهي، ۽ هي فيصلو سوشل ميڊيا تي غلط معلومات جي خلاف هڪ اهم مثال طور ڏٺو پيو وڃي.
