پشاور (ويب ڊيسڪ) پشاور ۾ خيبرپختونخوا اسيمبلي جو اجلاس ٿيو، جتي پاڪستان تحريڪ انصاف جي نامزد اميدوار محمد سهيل آفريدي کي نئون وزيراعليٰ چونڊيو ويو. چونڊ دوران اپوزيشن ميمبرن واڪ آئوٽ ڪيو، جڏهن ته اسپيڪر بابر سليم علي امين گنڊاپور جو استعيفيٰ منظور ڪرڻ جي رولنگ ڏني.
وزيراعليٰ جي چونڊ لاءِ پي ٽي آءِ جي سهيل آفريدي، جي يو آءِ (ف) جي مولانا لطف الرحمان، مسلم ليگ (ن) جي سردار شاهجهان يوسف ۽ پيپلز پارٽي جي ارباب زرڪ اميدوار هئا. اجلاس جي صدارت اسپيڪر بابر سليم سواتي ڪئي.
اجلاس جي شروعات تي علي امين گنڊاپور پي ٽي آءِ چيئرمين جي تصوير کڻي نعريبازي جو جواب ڏنو. ان دوران پي ٽي آءِ ڪارڪنن اسيمبلي هال جو دروازو بند ٿيڻ تي احتجاج ڪيو ۽ سيڪيورٽي عملي سان منهن ماري بعد اندر داخل ٿي ويا.
ڊاڪٽر امجد، پي ٽي آءِ جي ايم پي اي، پنهنجي خطاب ۾ تحريڪ لبيڪ جي ڪارڪنن سان ٿيل زيادتين جي مذمت ڪئي ۽ شهيدن لاءِ دعا ڪئي.
اسپيڪر اعلان ڪيو ته علي امين گنڊاپور 8 آڪٽوبر تي استعيفيٰ ڏئي چڪو آهي، جنهن جي تصديق 11 آڪٽوبر تي گورنر به ڪئي. اسپيڪر موجب، استعيفيٰ آئيني طور منظور ٿيل آهي ۽ نئون وزيراعليٰ چونڊڻ سندس آئيني ذميواري آهي.
چونڊ عمل دوران پنج منٽ لاءِ گهنٽيون وڄايون ويون ته جيئن غير حاضر ميمبرن جي حاضري يقيني بڻائي سگهجي. پي ٽي آءِ جا ميمبر لابي نمبر 1 ۾ گڏ ٿيا. ووٽنگ بعد ٻيهر گهنٽيون وڄايون ويون.
نتيجن موجب، سهيل آفريدي 90 ووٽ وٺي نئون قائدِ ايوان چونڊجي ويو، جڏهن ته اپوزيشن جي بائيڪاٽ سبب انهن جي اميدوارن کي ووٽ نه ملي سگهيا. پي ٽي آءِ جو ايم پي اي آصف محسود ملڪ کان ٻاهر هجڻ سبب ووٽ نه ڏئي سگهيو.
نومنتخب وزيراعليٰ کي ميمبرن مبارڪباد ڏني. اسپيڪر چيو ته سهيل آفريدي جو چونڊجڻ سڄي صوبي لاءِ اهم آهي، ۽ جيڪو ملڪ سان محبت ڪري، محنت ڪري، اهو ئي ڪامياب ٿيندو.
