ممبئي (شوبز ڊيسڪ)بالي ووڊ جي مشهور اداڪار سنجي دت جو نشي جي لت بابت ڏنل پراڻو بيان هڪ ڀيرو ٻيهر سوشل ميڊيا تي وائرل ٿي ويو آهي، جنهن ۾ هن پنهنجي زندگي جي ڏکين دور، نشي جي عادت، ۽ ان مان ڇوٽڪاري بابت تفصيل سان ڳالهه ڪئي آهي.
1994ع ۾ فلم “آتش” جي سيٽ تي رڪارڊ ڪيل وڊيو ۾ سنجي دت اعتراف ڪيو ته هو نشي جي اهڙي حد تائين پهچي ويو هو، جتي هو پاڻ کي مرندو ڏسي رهيو هو. هن چيو ته، “مان ماڻهن کان لڪجڻ کان تنگ اچي ويو هوس، تنهن ڪري مون پنهنجي گهر وارن کان مدد وٺڻ جو فيصلو ڪيو.”
رپورٽن موجب، سنجي دت 1980ع کان 1981ع جي وچ ۾ نشي جي لت ۾ مبتلا ٿيو، جڏهن سندس ماءُ، مشهور اداڪارا نرگس، نيويارڪ ۾ علاج هيٺ هئي. سنجي جي خواهش هئي ته سندس ماءُ سندس پهرين فلم “راڪي” ڏسي، پر فلم جي رليز کان ٽي ڏينهن اڳ نرگس جو انتقال ٿي ويو، جنهن هن کي سخت صدمو ڏنو.
سنجي دت ٻڌايو ته نشي مان ڇوٽڪاري لاءِ ورزش هن جي مدد ڪئي ۽ ان کي “زندگي بچائيندڙ” قرار ڏنو. فلم “آتش” ۾ ساڻس گڏ ڪم ڪندڙ اداڪارا تنوجا انڪشاف ڪيو ته شوٽنگ دوران سنجي جي جسماني حالت ايتري ڪمزور هئي جو کين هدايت ڏني وئي ته هو سنجي کي هٿ به نه لڳائين.
سنجي جي ڀيڻ، پريا دت، موجب، سنجي کي مڪمل صحتيابي حاصل ڪرڻ ۾ لڳ ڀڳ ساڍا ٽي سال لڳا. آمريڪا ۾ ڊگهي ريهيب جي عمل کان پوءِ هن ٻيهر پنهنجي زندگي جي شروعات ڪئي.
سوشل ميڊيا تي هن وڊيو جي وائرل ٿيڻ کان پوءِ مداحن طرفان سنجي دت جي همت ۽ جدوجهد جي واکاڻ ڪئي پئي وڃي.
