مريدڪي (ويب ڊيسڪ)مريدڪي ۾ هڪ سياسي ۽ مذهبي جماعت جي پرتشدد احتجاج دوران پوليس ۽ قانون لاڳو ڪندڙ ادارن تي حملي کان پوءِ پوليس جو تفصيلي موقف سامهون اچي ويو آهي. پوليس موجب مڇريل مظاھرين کي ڇڙوڙ ڪيو ويو آهي ۽ صورتحال تي مڪمل طور تي ضابطو حاصل ڪيو ويو آهي.
پوليس ذريعن مطابق هي واقعو 12 ۽ 13 آڪٽوبر جي وچ واري رات پيش آيو، جڏهن احتجاج ڪندڙن انتهائي پرتشدد رويو اختيار ڪيو. انتظاميا ابتدائي طور ڳالهين ذريعي معاملو حل ڪرڻ جي ڪوشش ڪئي ۽ مظاهرين کي گهٽ متاثر ٿيندڙ هنڌ منتقل ٿيڻ جي هدايت ڏني، پر احتجاجي قيادت ماڻهن کي ڀڙڪائيندي رهي.
مڇريل مظاهرين پوليس تي پٿراءُ، ڪيلن وارن ڏنڊن ۽ پيٽرول بم سان حملا ڪيا. ڪجهه اهلڪارن کان هٿيار به ڦريا ويا، جن مان فائرنگ ڪئي وئي. پوليس موجب هڪ آفيسر شهيد ۽ 48 اهلڪار زخمي ٿيا. پوسٽ مارٽم رپورٽ مان تصديق ٿي آهي ته شهيد آفيسر کي ڦريل سرڪاري هٿيار سان گولي هڻي قتل ڪيو ويو.
پوليس جو چوڻ آهي ته مظاهرين جي حملي سبب گهٽ ۾ گهٽ 40 سرڪاري ۽ نجي گاڏيون ساڙيون ويون، ڪيترائي دڪان به سڙي ويا، جڏهن ته 17 ماڻهو گولين لڳڻ سبب زخمي ٿيا. تصادم دوران ٽي ٽي ايل پي ڪارڪن ۽ هڪ راھگير فوت ٿي ويا، جڏهن ته لڳ ڀڳ 30 عام شهري زخمي ٿيا، جن کي ويجهن اسپتالن ۾ منتقل ڪيو ويو آهي.
پوليس موجب وڳوڙين يونيورسٽي بس سميت ڪيترين ئي گاڏين کي اغوا ڪري احتجاج ۾ استعمال ڪيو. اکين ڏٺن شاهدن مطابق ڪجهه گاڏيون ماڻهن کي لتاڙڻ لاءِ به هلائيون ويون. ڪيترن ئي هنڌن تي پوليس تي منظم انداز ۾ پٿراءُ، پيٽرول بم ۽ ڪيلن وارن ڏنڊن سان حملا ڪيا ويا، جڏهن ته بي ترتيب فائرنگ به رڪارڊ ڪئي وئي.
پوليس ڪيترن ئي مظاهرين کي گرفتار ڪري ورتو آهي، جڏهن ته سعد رضوي سميت ڪجهه اڳواڻ موقعي تان فرار ٿي ويا. پوليس موجب فرارين جي ڳولا لاءِ سرچ آپريشن جاري آهي. ترجمان جو چوڻ آهي ته هي پرامن احتجاج نه، پر منظم تشدد جي ڪارروائي هئي، جنهن ۾ قيادت عوام ۽ رياست ٻنهي کي خطري ۾ وڌو.
پوليس ترجمان وڌيڪ چيو ته شهرين جي جان ۽ مال جو تحفظ رياست جي ذميواري آهي ۽ اهڙن عنصرن کي قانون مطابق سخت جواب ڏنو ويندو. هٿيار ڦرڻ، سرڪاري ملڪيتن کي ساڙڻ ۽ عوام تي حملو ڪرڻ ڪنهن به صورت ۾ احتجاج نه، پر ڏوهه آهي.
