لاهور(ويب ڊيسڪ) مريدڪي ۾ پرتشدد احتجاج کان پوءِ روپوش ٿيل تحريڪ لبيڪ پاڪستان (ٽي ايل پي) جي سربراهه حافظ سعد رضوي ۽ سندس ڀاءُ انس رضوي جو پوليس طرفان پتو لڳايو ويو آهي، ۽ سندن گرفتاري هاڻ صرف وقت جو سوال آهي.
پوليس ذريعن موجب، خفيه معلومات ۽ ٽيڪنيڪل ٽريڪنگ جي مدد سان ٻنهي اڳواڻن جو ٺڪاڻو معلوم ڪيو ويو آهي. سيڪيورٽي ادارا مڪمل الرٽ تي آهن ۽ ڪارروائي لاءِ تيار بيٺا آهن. پوليس طرفان ٻنهي اڳواڻن کي پرامن طريقي سان خودسپردگي جي هدايت ڏني وئي آهي.
پوليس جو چوڻ آهي ته جيڪڏهن سعد رضوي يا انس رضوي زخمي آهن ته رياست طرفان طبي سهولتون فراهم ڪيون وينديون، بشرطيڪه هو پاڻ کي قانون جي حوالي ڪن. تاحال سندن زخمي هجڻ جي تصديق نه ٿي سگهي آهي.
ذريعن موجب، ٻنهي اڳواڻن جو حرڪت جو دائرو محدود ڪيو ويو آهي، ۽ پوليس خبردار ڪيو آهي ته جيڪڏهن ڪنهن به شخص سندن مدد ڪئي ته ان خلاف سخت قانوني ڪارروائي ڪئي ويندي. رياست نرمي جو دروازو کليل رکيو آهي، پر قانون کان ڀڄڻ جي اجازت نه ڏني ويندي.
ٻئي طرف، پوليس طرفان مريدڪي ۾ احتجاج کان فرار ٿيل ٽي ايل پي اڳواڻن جي گرفتاري لاءِ سرچ آپريشن جاري آهي، جنهن دوران ڪيترن ئي ماڻهن کي گرفتار ڪيو ويو آهي.
پوليس ذريعن موجب، ٽي ايل پي جي احتجاج منظم تشدد جو حصو هو، جنهن ۾ قيادت طرفان هجوم کي اکسايو ويو. مظاهرين طرفان پوليس تي پتھراؤ، پيٽرول بم، ۽ ڪيلن وارا ڏنڊا استعمال ڪيا ويا، جڏهن ته پوليس اهلڪارن کان هٿيار به ڇني ويا، جن مان فائرنگ به ڪئي وئي.
واقعي دوران 48 پوليس اهلڪار زخمي ٿيا، جن مان 17 کي گن شاٽ لڳا. تصادم ۾ ٽي ٽي ايل پي ڪارڪن ۽ 6 راھگير فوت ٿيا، جڏهن ته 30 کان وڌيڪ شهرين زخمي ٿيا. مظاهرين طرفان 40 کان وڌيڪ سرڪاري ۽ نجي گاڏيون ساڙيون ويون، ۽ ڪيترين ئي دڪانن کي نقصان پهچايو ويو.
عيني شاهدين موجب، ڪجهه گاڏيون عوام کي ڪچلڻ لاءِ به استعمال ڪيون ويون، ۽ ڪيترن ئي هنڌن تي اندها ڌند فائرنگ رڪارڊ ڪئي وئي. پوليس هن صورتحال کي قومي لمحہ فڪري قرار ڏيندي چيو آهي ته رياست جي ذميواري آهي ته شهرين جي جان ۽ مال جي تحفظ لاءِ گڏيل حڪمت عملي اختيار ڪئي وڃي.
