شڪارپور (رپورٽر) پاڪستان پيپلز پارٽي جي سينيئر اڳواڻ ۽ سنڌ اسيمبلي جي اڳوڻي اسپيڪر آغا سراج خان دراني جي جنازي نماز سندس اباڻي علائقي گڙهي ياسين ۾ دراني هائوس گرائونڊ تي ادا ڪئي وئي، جنهن ۾ وڏي انگ ۾ سياسي، سماجي ۽ مذهبي شخصيتن شرڪت ڪئي.
جنازي نماز ۾ سنڌ جي وڏي وزير سيد مراد علي شاهه صوبائي ڪابينا جي ميمبرن سان گڏ شرڪت ڪئي، جڏهن ته صوبائي وزيرن، اسيمبلي جي ميمبرن، پارٽي اڳواڻن، سرڪاري آفيسرن، صحافين، علما ۽ عام شهرين وڏي تعداد ۾ شرڪت ڪئي. وزيراعليٰ مراد علي شاهه مرحوم جي جسدِ خاڪي تي گلن جي چادر چاڙهي ۽ بلند درجات لاءِ دعا گهري.
جنازي نماز کانپوءِ آغا سراج دراني کي سندس اباڻي قبرستان ۾ مٽيءَ ماءُ حوالي ڪيو ويو. جنازي جي موقعي تي دراني هائوس گرائونڊ ۽ ان جي آسپاس هزارين سوڳوار موجود هئا، جڏهن ته مرحوم جي خاندان، دوستن، پارٽي ڪارڪنن ۽ علائقي واسين طرفان ڏک جو اظهار ڪيو ويو.
واضح رهي ته آغا سراج دراني گذريل هڪ مهيني کان ڪراچي جي نجي اسپتال ۾ برين هيمرج سبب علاج هيٺ هو، جتي هو ڪالھ لاڏاڻو ڪري ويو.
