سڊني: آسٽريليا جي مشهور تيراڪ ۽ چار دفعا اولمپڪ گولڊ ميڊلسٽ آريارني ٽٽمس صرف 25 ورهين جي عمر ۾ اوچتو رٽائرمينٽ جو اعلان ڪري مداحن کي حيران ڪري ڇڏيو آهي.
آسٽريلين ميڊيا موجب، آريارني ٽٽمس سوشل ميڊيا تي هڪ جذباتي پيغام ذريعي اعلان ڪيو ته هن 18 سال سوئمنگ کي ڏنا ۽ 10 سال ملڪ جي نمائندگي ڪئي، پر هاڻ وقت اچي ويو آهي ته زندگي جي ٻين پهلوئن ڏانهن ڌيان ڏنو وڃي. هن چيو ته سوئمنگ سان هميشه محبت رهي، پر ڪينسر جي خطري هن جي سوچ بدلائي ڇڏي.
واضح رهي ته آريارني ٽٽمس کي پيرس اولمپڪس کان اڳ ڪينسر جي ٽيومر جي سرجري ڪرائڻي پئي هئي، جيڪا هن لاءِ ذهني طور تي هڪ وڏو ڌڪ ثابت ٿي.
ٽٽمس 1964 کانپوءِ آسٽريليا جي پهرين تيراڪ هئي، جنهن هڪ ئي ايونٽ ۾ لڳاتار ٻه اولمپڪ گولڊ ميڊل حاصل ڪيا. هن پيرس اولمپڪس ۾ 400 ميٽر فري اسٽائل ۾ ٻن اڳوڻن ورلڊ رڪارڊ هولڊرن کي شڪست ڏئي گولڊ ميڊل حاصل ڪيو. ٽوڪيو ۽ پيرس اولمپڪس ۾ گڏيل طور تي 8 ميڊلز سندس نالي تي آهن، جڏهن ته هو 200 ۽ 400 ميٽر فري اسٽائل ۾ ورلڊ رڪارڊ هولڊر پڻ رهي آهي.
آريارني ٽٽمس جي اوچتي رٽائرمينٽ سان عالمي سوئمنگ جي دنيا هڪ عظيم تيراڪ کان محروم ٿي وئي آهي، جنهن جي ڪارڪردگي کي هميشه ياد رکيو ويندو.
