اوسڪ (ويب ڊيسڪ) ترڪي جي شهر اوسڪ جي عدالت هڪ شهري کي پنهنجي زال کي هرجاڻو ادا ڪرڻ جو حڪم ڏنو، ڇو ته هن پنهنجي موبائل فون ۾ زال جو نمبر “موٽي” جي نالي سان محفوظ ڪيو هو، جيڪو عدالت موجب توهين آميز ۽ جذباتي تشدد جي صورت آهي.
عدالتي ڪارروائي دوران انڪشاف ٿيو ته مڙس طرفان زال لاءِ استعمال ڪيل نالو عزت ۽ احترام جي خلاف هو، جيڪو ازدواجي رشتن جي بنيادي اصولن جي ڀڃڪڙي آهي. عدالت واضح ڪيو ته اهڙي عمل سان زال جي شخصيت کي تڪليف پهتي، جيڪا جذباتي طور تي نقصانڪار آهي.
ترڪي جي اعليٰ عدالت هيٺين عدالت جي فيصلي کي برقرار رکندي چيو ته اهڙي نالي سان نمبر محفوظ ڪرڻ ازدواجي وفاداري، عزت ۽ برابري جي اصولن جي خلاف آهي. عدالت جو فيصلو هاڻ ترڪي ۾ هڪ قانوني مثال بڻجي چڪو آهي، جنهن کي مستقبل ۾ اهڙن ڪيسن لاءِ حوالو طور استعمال ڪري سگهجي ٿو.
اهو فيصلو سماجي رشتن ۾ احترام جي اهميت کي اجاگر ڪري ٿو ۽ واضح ڪري ٿو ته ذاتي ٽيڪنالاجي جي استعمال ۾ به اخلاقي حدون لاڳو ٿين ٿيون.
