ڪيچ بلوچستان(ويب ڊيسڪ)ضلعي ڪيچ جي شهر تربت ۾ ڊپٽي ڪمشنر جي قافلي تي ريموٽ ڪنٽرول بم سان ٿيل حملي ۾ ليوي فورس جي اهلڪارن سميت 8 ڄڻا زخمي ٿي پيا. ڌماڪو پريس ڪلب روڊ تي ان وقت ٿيو، جڏهن ڊپٽي ڪمشنر بشير احمد بَڙيچ جو قافلو اُتان لنگهي رهيو هو.
پوليس موجب، ڌماڪي کانپوءِ زخمين کي ترت طبي امداد لاءِ ويجهي سرڪاري اسپتال منتقل ڪيو ويو، جتي سندن حالت خطري کان ٻاهر ٻڌائي پئي وڃي. ڊپٽي ڪمشنر بشير احمد بَڙيچ ڌماڪي ۾ محفوظ رهيا.
ايس ايس پي ڪيچ ڪيپٽن (ريٽائرڊ) زوهيب محسن بلوچ ٻڌايو ته ڌماڪي لاءِ بارودي مواد هڪ موٽر سائيڪل ۾ لڳايو ويو هو، جنهن کي ريموٽ ڪنٽرول ذريعي اڏايو ويو.
ڌماڪي کانپوءِ پوليس ۽ فرنٽيئر ڪانسٽيبلري (ايف سي) جي نفري واقعي واري هنڌ تي پهچي وئي جنهن علائقي کي گهيري ۾ وٺي جاچ شروع ڪئي وئي آهي. پوليس موجب، شاهديون گڏ ڪيون پيون وڃن ۽ دهشتگردن جي سڃاڻپ لاءِ جاچ جاري آهي.
واقعي سبب شهر ۾ خوف ۽ ڏهڪاءُ جي لهر پکڙجي وئي، جڏهن ته سيڪيورٽي ادارن طرفان حفاظتي انتظام سخت ڪيا ويا آهن.
