اسلام آباد(ويب ڊيسڪ) وزيراعظم محمد شهباز شريف، سعودي ولي عهد محمد بن سلمان سان رياض ۾ هڪ خوشگوار ماحول ۾ اهم ملاقات ڪئي، جتي ٻنهي ملڪن جي وچ ۾ واپار، سيڙپڪاري ۽ ٻطرفي لاڳاپن کي وڌيڪ مضبوط ڪرڻ بابت ڳالهيون ڪيون ويون.
وزيراعظم هائوس پاران جاري ڪيل بيان موجب، ملاقات جو گڏيل پڌرنامو جلد جاري ٿيڻ جي اميد آهي. ان ملاقات ۾ نائب وزيراعظم ۽ پرڏيهي وزير سينيٽر اسحاق ڊار، فِيلڊ مارشل سيد عاصم منير سميت ٻنهي ملڪن جي ڪابينا جا سينيئر ميمبر به شريڪ هئا.
ملاقات دوران گڏيل دلچسپي وارن معاملن تي ويچاريو ويو، جڏهن ته واپار، سيڙپڪاري ۽ ٻين شعبن ۾ سهڪار وڌائڻ تي زور ڏنو ويو.
ان کان اڳ، وزيراعظم شهباز شريف، سعودي ولي عهد محمد بن سلمان جي خاص دعوت تي “فيوچر انويسٽمينٽ انيشيئيٽو” جي نائين عالمي ڪانفرنس ۾ شرڪت لاءِ پاڪستاني وفد سان گڏ رياض پهتو. ڪنگ خالد انٽرنيشنل ايئرپورٽ تي رياض جي نائب گورنر شهزادو محمد بن عبدالرحمان بن عبدالعزيز، پاڪستان ۾ سعودي سفير نواف بن سعيد المالڪي ۽ سعودي عرب ۾ پاڪستاني سفير احمد فاروق پاران سندس آجيان ڪئي وئي.
وزيراعظم سان گڏ اعليٰ سطحي وفد ۾ نائب وزيراعظم اسحاق ڊار، ناڻي وارو وفاقي وزير محمد اورنگزيب، اطلاعات وارو وفاقي وزير عطاالله تارڙ، خاص مددگار طارق فاطمي ۽ بلال بن ثاقب شامل هئا.
فيوچر انويسٽمينٽ انيشيئيٽو ڪانفرنس ۾ دنيا جا اڳواڻ، سيڙپڪار، پاليسي ساز ۽ مختلف شعبن جا ماهر شرڪت ڪري رهيا آهن، جتي وزيراعظم پاڪستان جي نمائندگي ڪندو. هو پائيدار واڌاري، اقتصادي شراڪت، جدت ۽ عالمي سياسي تبديليءَ بابت خيالن جو اظهار ڪندو.
دوري دوران وزيراعظم سعودي قيادت سان وڌيڪ ملاقاتون به ڪندو، جن ۾ واپار، توانائي، انساني وسيلن ۽ سيڙپڪاري سميت ٻين شعبن ۾ سهڪار وڌائڻ تي ڳالهيون ٿينديون. عالمي ۽ علائقائي معاملن تي به خيالن جي ڏي وٺ ٿيندي.
وزيراعظم عالمي اڳواڻن ۽ بين الاقوامي ادارن جي سربراهن سان به ملاقاتون ڪندو، جتي پاڪستان ۾ سيڙپڪاري ۽ پائيدار ترقيءَ بابت امڪانن تي ڳالهيون ٿينديون.
