تهران (ويب ڊيسڪ) ايران جي پاسداران انقلاب جي ميجر جنرل ۽ ايران جي سپريم ليڊر جي صلاحڪار رحيم صفوي چيو آهي ته سعودي عرب ۽ پاڪستان جو گڏيل دفاعي معاهدو هڪ مثبت اڳڀرائي آهي.
ايراني ميڊيا سان ڳالهائيندي رحيم صفوي چيو ته جيڪڏهن ايران به هن معاهدي ۾ شامل ٿي وڃي ته اهو سٺو قدم هوندو. اسلامي ملڪن کي گهرجي ته هو پنهنجا اختلاف پاسي تي رکي، گڏجي مشترڪ چئلينجن جو مقابلو ڪن.
هن چيو ته آمريڪا جو علائقائي اثر گهٽجي رهيو آهي، ۽ هاڻ آمريڪا پنهنجي ڌيان ايشيا پيسيفڪ خطي ڏانهن منتقل ڪري رهيو آهي. هي وقت آهي ته اسان هڪ علائقائي اسلامي سيڪيورٽي بلاڪ جي جوڙجڪ تي سنجيدگي سان غور ڪريون، ته جيئن خطي ۾ استحڪام ۽ خودمختياري يقيني بڻائي سگهجي.
واضح رهي ته ڪجهه ڏينهن اڳ پاڪستان ۽ سعودي عرب جي وچ ۾ هڪ گڏيل دفاعي معاهدو ٿيو هو، جنهن جي گڏيل اعلاميي ۾ چيو ويو هو ته ڪنهن به هڪ ملڪ تي حملو ٻئي ملڪ تي حملو تصور ڪيو ويندو.
ٻئي طرف نائب وزيراعظم اسحاق ڊار لنڊن ۾ پاڪستاني هاءِ ڪميشن جي ٻاهران ميڊيا سان ڳالهائيندي چيو ته سعودي عرب کان پوءِ ڪيترائي ٻيا ملڪ به پاڪستان سان دفاعي معاهدو ڪرڻ چاهين ٿا.
