تهران (ويب ڊيسڪ) ايران جي پرڏيهي وزير عباس عراقچي آمريڪا پاران 33 سالن بعد ايٽمي تجربا ٻيهر شروع ڪرڻ جي فيصلي تي سخت ردعمل ظاهر ڪيو آهي. هن آمريڪي قدم کي غير ذميواراڻو ۽ شرپسنداڻو قرار ڏيندي چيو ته “ايٽمي هٿيارن سان ليس شرپسند ملڪ دنيا جي امن لاءِ خطرو بڻجي ويو آهي.”
واضح رهي ته آمريڪي صدر ڊونلڊ ٽرمپ چين ۽ روس جي وڌندڙ ايٽمي پروگرامن جي ردعمل طور آمريڪا جي ايٽمي هٿيارن جي جانچ فوري طور تي برابري جي بنياد تي شروع ڪرڻ جو حڪم ڏنو آهي.
ايران جي بيان موجب، آمريڪا جو هي قدم بين الاقوامي قانونن جي ڀڃڪڙي آهي، خاص طور تي جامع ايٽمي تجرباتي پابندي معاهدي (CTBT) جي اصولن جي خلاف، جنهن تي دنيا جي 187 ملڪن دستخط ڪيا آهن، جيتوڻيڪ آمريڪا اڃا تائين ان جي توثيق نه ڪئي آهي.
عباس عراقچي جو چوڻ هو ته آمريڪا نه رڳو ايٽمي تجربا بحال ڪري رهيو آهي، پر ايران جي پرامن ايٽمي پروگرام کي به بدنام ڪرڻ جي ڪوشش ڪري رهيو آهي. هن چيو ته آمريڪا جي رويي سان خطي ۾ اڳ ئي وڌندڙ تڪرار مزيد سنگين صورتحال اختيار ڪري سگهي ٿو.
ايران عالمي برادري کان مطالبو ڪيو آهي ته هو آمريڪا جي هن قدم خلاف واضح موقف اختيار ڪري ته جيئن عالمي امن کي بچائي سگهجي.
