ڪراچي (ويب ڊيسڪ) گارڊن نشتر روڊ تي تيز رفتار ڊمپر جي ٽڪر سان نوجوان جي موت ۽ سندس زال جي زخمي ٿيڻ بعد ڊمپر ايسوسيئيشن جي صدر لياقت محسود خلاف ٻيو ڪيس داخل ڪيو ويو، جڏهن ته لياقت محسود رامسوامي ۾ مبينا فائرنگ خلاف ڪارروائي نه ٿيڻ تي سپر هاءِ وي بند ڪرڻ جو اعلان ڪري ڇڏيو.
واقعي جي تفصيل موجب، سومر جي رات نشتر روڊ، رامسوامي رستم جي ڪمپائونڊ ڀرسان تيز رفتار ڊمپر موٽر سائيڪل سوار 23 ورهين جي نوجوان شاهزيب کي ٽڪر هنئي، جنهن جي نتيجي ۾ هو فوت ٿي ويو، جڏهن ته سندس زال 21 ورهين جي مصباح زخمي ٿي پئي. واقعي بعد مشتعل شهرين ڊمپر کي باهه ڏئي ڇڏي.
گارڊن ٿاڻي ۾ ٻھ الڳ ڪيس داخل ڪيا ويا. پهريون ڪيس شاهزيب جي والد محمد شاهد جي مدعيت ۾ گرفتار ڊمپر ڊرائيور نياز ولد افضل خان خلاف قتل بالسبب، غفلت ۽ لاپرواهي جي قلمن تحت داخل ڪيو ويو، جڏهن ته ٻيو ڪيس سماجي ڪارڪن عبدالقادر جي مدعيت ۾ لياقت محسود، سندس گن مينن ۽ 20 کان 25 صورت شناس هٿياربند ماڻهن خلاف داخل ڪيو ويو.
عبدالقادر پنهنجي وڊيو بيان ۾ الزام لڳايو ته لياقت محسود هٿياربند ماڻهن سان گڏ علائقي ۾ داخل ٿيو ۽ هوائي فائرنگ ڪئي. هن چيو ته اسان ڪراچي جي نوجوانن کي اڪيلو نه ڇڏينداسين، ڪراچي اسان جو آهي، هتي جا ماڻهو اسان جا آهن. هن مطالبو ڪيو ته اهڙن واقعن تي شهر جي هر علائقي ۾ ڪيس داخل ڪيا وڃن.
ان موقعي تي موجود سياسي اڳواڻن به عوام کي اپيل ڪئي ته اهڙن سانحن تي خاموش نه ويهجن، پر اڳيان اچي قانوني ڪارروائي لاءِ آواز بلند ڪن.
ٻئي طرف، لياقت محسود رامسوامي ۾ مبينا فائرنگ ۽ ڪار کي باهه ڏيڻ جي ڪوشش خلاف ڪارروائي نه ٿيڻ تي احتجاج طور منگل ڏينهن 2 وڳي سپر هاءِ وي بند ڪرڻ جو اعلان ڪيو. ترجمان ڊمپر ايسوسيئيشن موجب، لياقت محسود جي ڪار تي فائرنگ جا واضح نشان موجود آهن، پر ڪيس داخل نه ٿيو. ترجمان چيو ته واقعو شهر جي امن لاءِ خطرناڪ آهي، انتظاميه فوري نوٽيس وٺي ۽ جوابدارن کي گرفتار ڪري، جڏهن ته حڪومت تنظيم جي صدر جي جان ۽ مال جي تحفظ کي يقيني بڻائي.
