اسلام آباد (ويب ڊيسڪ) ناڻي واري وفاقي محمد اورنگزيب چيو آهي ته پاڪستان جي بلو اڪانومي ملڪ جي اقتصادي ترقي لاءِ گيم چينجر ثابت ٿي سگهي ٿي، جيڪا نون موقعن جا دروازا کولڻ جي صلاحيت رکي ٿي.
هن پاڪستان انٽرنيشنل ميرٽائم ايڪسپو اينڊ ڪانفرنس جي افتتاحي اجلاس ۾ ورچوئل خطاب ڪندي چيو ته حڪومت پاليسين جي تسلسل، سيڙپڪاري جي واڌاري ۽ پائيدار بحري ترقي لاءِ پرعزم آهي، جنهن سان 2047 تائين هن شعبي کي 100 ارب ڊالر جي معيشت ۾ تبديل ڪرڻ جو هدف حاصل ڪري سگهجي ٿو.
محمد اورنگزيب ٻڌايو ته گذريل ٻن سالن دوران پاڪستان جي معيشت ۾ استحڪام آيو آهي، زرمبادله جا ذخيرا 14.5 ارب ڊالر کان وڌي ويا آهن، مهانگائي سنگل ڊيجيٽ ۾ اچي وئي آهي ۽ روپئي جي قدر مستحڪم آهي. پاليسي ريٽ ۾ گهٽتائي ۽ عالمي ريٽنگ ايجنسين طرفان پاڪستان جي معيشت کي مستحڪم قرار ڏيڻ عالمي اعتماد جو مظاهرو آهي. آءِ ايم ايف سان تازو اسٽاف ليول معاهدو به حڪومت جي پاليسين تي عالمي ادارن جي اعتماد جي علامت آهي.
هن چيو ته پاڪستان هاڻي اهڙي مرحلي تي آهي جتي چين، آمريڪا، سعودي عرب ۽ گڏيل عرب امارات جهڙن روايتي اتحادي ملڪن سان واپاري ۽ سيڙپڪاري جي شعبي ۾ عملي سهڪار وڌائي سگهجي ٿو.
ناڻي واري وزير ٻڌايو ته هن وقت سامونڊي معيشت جو ملڪ جي جي ڊي پي ۾ حصو صرف 0.4 کان 0.5 سيڪڙو آهي، جيڪو تقريباً هڪ ارب ڊالر جي برابر آهي، پر ان ۾ بي پناهه امڪان موجود آهن. 2047 تائين ان شعبي کي 100 ارب ڊالر تائين وٺي وڃڻ جو هدف حقيقت پسندانه ۽ حاصل ڪرڻ جوڳو آهي.
هن چيو ته حڪومت ماهيگيري ۽ آبي زراعت جي شعبي ۾ ويليو ايڊڊ پراسيسنگ، ڪولڊ چين انفرااسٽرڪچر ۽ عالمي معيار جي حفظان صحت جي شرطن کي فروغ ڏئي رهي آهي ته جيئن سامونڊي خوراڪ جي برآمدات موجوده 50 ڪروڙ ڊالر مان وڌائي ايندڙ ڪجهه سالن ۾ 2 ارب ڊالر تائين پهچائي سگهجن.
محمد اورنگزيب يقين ڏياريو ته حڪومت پاليسين جي تسلسل کي يقيني بڻائيندي ته جيئن ڊگهي مدي وارا منصوبا بنا رڪاوٽ اڳتي وڌن. هن ڪراچي، قاسم ۽ گوادر بندرگاهن جي جديد اپگريڊيشن، ڊجيٽلائيزيشن، قابل تجديد توانائي جهڙوڪ ٽائيڊل ۽ آف شور ونڊ انرجي، ۽ “بلو بانڊز” جهڙن جديد مالي ذريعن تي زور ڏنو.
ناڻي واري وزير چيو ته ميرٽائم بائيو ٽيڪنالاجي ۽ علائقائي سهڪار پاڪستان جي پائيدار اقتصادي ترقي ۾ اهم ڪردار ادا ڪري سگهن ٿا. بلو اڪانومي، مصنوعي ذهانت، ڊجيٽل انفرااسٽرڪچر ۽ معدنيات جهڙا ابھرتا شعبا ملڪ جي ترقي لاءِ نوان محرڪ بڻجي سگهن ٿا.
آخر ۾ وزير خزانه ڪانفرنس جي منتظمين ۽ شرڪت ڪندڙن لاءِ نيڪ تمنائن جو اظهار ڪندي اميد ظاهر ڪئي ته هن ڪانفرنس مان سامهون ايندڙ تجويزون پاڪستان جي بحري ۽ اقتصادي ترقي لاءِ مددگار ثابت ٿينديون. هن پاڪستان نيوي، وزارت بحري امور ۽ نيشنل انسٽيٽيوٽ آف ميرٽائم افيئرز کي عالمي معيار جي ڪانفرنس منعقد ڪرڻ تي ساراهه پيش ڪئي.
