نيويارڪ(ويب ڊيسڪ) نيويارڪ سٽي جي ميئرشپ لاءِ ٿيل تاريخي چونڊن ۾ 34 ورهين جو ڊيموڪريٽڪ سوشلسٽ زهران ممداني پهريون مسلمان ميئر طور چونڊجي آيو، جنهن 49.6 سيڪڙو ووٽ حاصل ڪري اڳوڻي گورنر اينڊريو ڪوومو کي شڪست ڏني، جنهن 41.6 سيڪڙو ووٽ ورتا.
ممداني جي چونڊ مهم ترقي پسند منشور تي ٻڌل هئي، جنهن ۾ هن ڪرائي منجمد ڪرڻ، سرڪاري گروسري اسٽور کولڻ ۽ مفت بس سروس جو واعدو ڪيو. هن غزه ۾ اسرائيل جي ڪارروائين کي نسل ڪشي قرار ڏنو ۽ اعلان ڪيو ته جيڪڏهن نيتن ياهو نيويارڪ آيو ته سندس خلاف گرفتاري جا وارنٽ جاري ڪيا ويندا.
اينڊريو ڪوومو جي مهم جنسي هراسانين ۽ نرسنگ هومز جي بدانتظامي سبب متاثر ٿي، جڏهن ته ريپبلڪن اميدوار ڪرٽس سلوا جي موجودگي به ڪوومو جي ووٽن کي ورهائي ڇڏيو، جنهن ممداني جي فتح کي آسان بڻايو.
امريڪا جي هن چونڊ ۾ 1969 کان پوءِ پهريون ڀيرو 2 ملين کان وڌيڪ ماڻهن ووٽ ڏنو، جڏهن ته ورجينيا ۾ ڊيموڪريٽ ايبيگيئل اسپينبرگر به گورنر جي چونڊ ۾ ريپبلڪن اميدوار کي شڪست ڏني.
صدر ڊونلڊ ٽرمپ اڳواٽ خبردار ڪيو هو ته جيڪڏهن ممداني چونڊجي آيو ته نيويارڪ سٽي جي وفاقي فنڊنگ روڪڻ تي غور ڪيو ويندو.
