اسلام آباد (ويب ڊيسڪ) ستاويهين آئيني ترميم تي اتفاق راءِ لاءِ وزيراعظم شهباز شريف سان اتحادي جماعتن جا وفد مشاورتي ملاقاتون ڪري رهيا آهن، جتي بلدياتي ادارن جي بااختياري، عدالتي ڍانچي ۾ تبديليون ۽ صوبائي نمائندگي جا اهم نڪات زِيرِ غور آيا.
ايم ڪيو ايم پاڪستان جي وفد، جنهن جي اڳواڻي ڊاڪٽر خالد مقبول صديقي ڪئي، وزيراعظم سان ملاقات دوران مطالبو ڪيو ته ترميمي بل ۾ بلدياتي حڪومتن کي مالي ۽ انتظامي اختيار ڏيڻ بابت شِقون شامل ڪيون وڃن، وفد ۾ گورنر سنڌ ڪامران ٽسوري، صحت وارو وفاقي وزير سيد مصطفيٰ ڪمال ۽ قومي اسيمبلي جا ميمبر شامل هئا.
پيپلز پارٽيءَ جي وفد به وزيراعظم سان ملاقات ڪئي، جنهن ۾ مرتضىٰ وهاب، عِرفان قادر، راجا پرويز اشرف، نويد قَمر ۽ شيري رحمان شامل هئا. ملاقات بعد وفد نور خان ايئربيس روانو ٿيو، جتان هو ڪراچي ۾ ٿيندڙ سينٽرل ايگزيڪٽو ڪميٽي جي اجلاس ۾ شرڪت ڪندو.
استحڪام پاڪستان پارٽي جي صدر عبدالعليم خان ۽ عَون چوڌري به وزيراعظم سان ملاقات ڪئي، جتي ترميمي بل تي تفصيلي مشاورت ڪئي وئي. اجلاس ۾ نائب وزيراعظم اسحاق ڊار، اسپيڪر اياز صادق، خواجه آصف، اعظم نذير تارڙ، احد چيمه، عطا تارڙ، طارق فضل چوڌري ۽ رانا ثناءُ الله به موجود هئا.
مسلم ليگ قاف جي وفد، جنهن جي اڳواڻي وفاقي وزير سالڪ حسين ڪئي، به وزيراعظم سان ملاقات ڪئي. وفد ۾ سينيٽر كامل علي آغا، چوڌري محمد الياس ۽ فرخ خان شامل هئا، جن ترميمي بل تي پنهنجا خيال پيش ڪيا.
بلوچستان عوامي پارٽي جي وفد، خالد مگسي جي اڳواڻيءَ ۾، وزيراعظم سان ملاقات دوران بلوچستان جي صوبائي ۽ قومي اسيمبلي جي سيٽن بابت به ڳالهيون ڪيون. وفد ۾ سينيٽر عبدالقادر، منظور ڪاڪڙ، ثمينه ممتاز ۽ دينش ڪمار شامل هئا.
ذريعن موجب، وزيراعظم شهباز شريف سڀني اتحادي جماعتن کي اعتماد ۾ وٺي رهيو آهي، ۽ 27هين آئيني ترميم کي 14 نومبر تي قومي اسيمبلي مان منظور ڪرائڻ جو ارادو آهي. ان سلسلي ۾ سڀني وفاقي وزيرن ۽ پارليامينٽ ميمبرن جا غير ملڪي دورا منسوخ ڪيا ويا آهن.
واضح رهي ته اسپيڪر قومي اسيمبلي سڀني پارلياماني اڳواڻن سان مشاورت مڪمل ڪري ورتي آهي، جڏهن ته اجلاس جي ايجنڊا ۽ شيڊول جي منظوري به ڏني وئي آهي. اَلبتا، تحريڪ انصاف جي پارلياماني اڳواڻن اجلاس ۾ شرڪت نه ڪئي.
