حيدرآباد (رپورٽ: غلام حسين) سنڌ جي وڪيلن 27هين آئيني ترميم کي سخت لفظن ۾ رد ڪندي ان خلاف تحريڪ جو اعلان ڪري ڇڏيو آهي. حيدرآباد ۾ آل سنڌ لائيرز ايڪشن ڪميٽي جي سڏ تي ڪوٺايل ڪنوينشن ۾ وڪيلن وڏي انگ ۾ شرڪت ڪئي، جن ۾ ايڊووڪيٽ اسرار چانگ، ڪي بي لغاري، عامر وڙائچ، الطاف سچل اعواڻ، حسيب جمالي، حق نواز ٽالپر، سجاد چانڊيو، اشرف سمون، مير احمد مڱريو، اشعر مجيد کوکر، بابر مسعود، رسول ميمڻ، سيد طارق شاهه، علي اڪبر بروهي، جاويد بليدي، رشيد راڄر، لياقت سهتو، ميان تاج محمد ڪيريو، نورالحق قريشي، انيس رحمان ۽ ٻيا شامل هئا. عورت وڪيلن جي به وڏي انگ ۾ شرڪت ڪئي.
ڪنوينشن دوران “ترميم نامنظور” جا زوردار نعرا هنيا ويا. اڳواڻن خطاب ڪندي چيو ته 27هين ترميم آئين تي راتاهو آهي، جنهن سان عدالتي نظام کي مفلوج بڻائڻ جي سازش ڪئي پئي وڃي. هنن چيو ته ترميم ذريعي حڪمران پنهنجي مرضي جا جج مقرر ڪرڻ چاهين ٿا، جيڪي ڊڪٽيشن تي هلندا. اهڙي ترميم سان نه صرف آئين جي ڀڃڪڙي ٿيندي، پر سنڌ جي وسيلن تي به ڌاڙو هڻڻ جي ڪوشش ڪئي پئي وڃي.
وڪيل اڳواڻن خبردار ڪيو ته جيڪڏهن ترميم واپس نه ورتي وئي ته هو ٻيهر روڊن تي نڪرندا. هنن چيو ته ملڪ کي ٽوڙڻ جي سازش تحت راتو رات ترميمون آڻي صوبن جي خودمختياري ۽ عدالتي آزادي تي حملو ڪيو پيو وڃي. اين ايف سي ايوارڊ مان سنڌ جو حصو گهٽائڻ، آئيني عدالتون قائم ڪري مرضي جا جج لڳائڻ، ۽ عدالتي نظام کي کوکلو ڪرڻ جهڙا قدم ناقابل قبول آهن.
اڳواڻن چيو ته 26هين ترميم ۾ به اهڙا فيصلا ٿيا هئا، هاڻي وري انهن کي ورجايو پيو وڃي. حڪمران هر ڀيري ترميمون آڻي پنهنجو فائدو وٺڻ جي ڪوشش ڪن ٿا، جيڪا آئين جي سڌي ڀڃڪڙي آهي. وڪيلن اعلان ڪيو ته هو آئين جا محافظ آهن ۽ اهڙي ترميم کي ڪنهن به صورت ۾ قبول نه ڪندا.
ان موقعي تي آل سنڌ لائيرز ايڪشن ڪميٽي جي سيڪريٽري ۽ هاءِ ڪورٽ بار جي جنرل سيڪريٽري ايڊووڪيٽ اسرار چانگ اعلان ڪيو ته 14 نومبر تي قاسم آباد باءِ پاس تي ڪورٽ کان ريلي ڪڍي ڌرڻو هنيو ويندو، جڏهن ته ان ڏينهن سمورين ڪورٽن ۾ عدالتي ڪاررواين جو مڪمل بائيڪاٽ ڪيو ويندو.
