پشاور(ويب ڊيسڪ) پاڪستان تحريڪ انصاف جي اڳواڻ ۽ قومي اسيمبليءَ جي اڳوڻي اسپيڪر اسد قيصر چيو آهي ته 27هين آئيني ترميم کان پوءِ عدالتون انتظاميه جي ماتحت ٿي ويون آهن، هاڻ صرف الله جي عدالت ئي باقي بچي آهي۔
عدالت ۾ پيش ٿيڻ دوران ميڊيا سان ڳالهائيندي اسد قيصر ترميم تي سخت تنقيد ڪندي چيو ته هن تبديليءَ ۾ عوام لاءِ ڪجهه به ناهي، عدالتن کي انتظاميه جي ڪنٽرول هيٺ آڻي عوام کي انصاف لاءِ در در جي ٺوڪرن تي مجبور ڪيو ويو آهي۔
هن چيو ته جيڪڏهن پشاور مان ڪنهن جج کي اسلام آباد يا پنجاب منتقل ڪيو ويندو ته هو ڪهڙي سوچ سان ڪم ڪندو؟ هن دعويٰ ڪئي ته ترميم لاءِ ٻن سينيٽرن تي دٻاءُ وڌو ويو، جڏهن ته 18هين ترميم سڀني سياسي جماعتن جي اتفاق سان منظور ڪئي وئي هئي۔
اسد قيصر چيو ته 1973 جو آئين ذوالفقار علي ڀٽو جو تحفو هو، پر بلاول ڀٽو پنهنجي نانا جي ورثي کي دفن ڪري ڇڏيو، جڏهن ته ايمل ولي خان به هن ترميم جي حمايت ڪئي۔ هن ٻڌايو ته سيف الله ابڙو کي پارٽي مان ڪڍي ڇڏيو ويو آهي ۽ ان جي خلاف ڪارروائي ڪئي ويندي۔
پي ٽي آءِ اڳواڻ چيو ته جلد جرگو ٿيندو، جيڪو اسان جي روايت آهي، افغانستان سان لاڳاپا ٺيڪ ناهن، ۽ اسان چاهيون ٿا ته جرگي ۾ سڀني مذهبن ۽ سياسي ڌرين جا نمائندا شامل ٿين۔ هن اميد ظاهر ڪئي ته امن جرگي ۾ سڀ سياسي جماعتون شرڪت ڪنديون۔
ان کان اڳ پشاور هاءِ ڪورٽ ۾ اسد قيصر جي داخل ڪيل درخواست تي جسٽس سيد ارشد علي ۽ جسٽس محمد فهيم ولي ٻڌڻي ڪئي، جنهن دوران عدالت کيس ڪنهن به داخل ٿيل مقدمي ۾ گرفتار نه ڪرڻ جو حڪم ڏيندي لاڳاپيل ڌرين کان رپورٽ طلب ڪئي۔
