راولپنڊي(ويب ڊيسڪ) تاجڪستان جي بچاءُ واري وزير ڪرنل جنرل صابر زاده امام علي عبدالرحيم پاڪستان جي دوري دوران جنرل هيڊڪوارٽرز (جي ايڇ ڪيو) راولپنڊي پهتو، جتي هن پاڪستان جي آرمي چيف فِيلڊ مارشل سيد عاصم منير سان تفصيلي ملاقات ڪئي.
آءِ ايس پي آر موجب، ملاقات دوران ٻنهي ملڪن جي وچ ۾ باهمي دلچسپي وارن معاملن، علائقائي سلامتي جي صورتحال ۽ دفاعي تعاون تي خيالن جي ڏي وٺ ڪئي وئي.
ملاقات ۾ موجوده ملٽري ٽو ملٽري تعاون کي وڌيڪ وڌائڻ جو عزم ظاهر ڪيو ويو، خاص طور تي تربيت، دهشتگردي جي خاتمي ۽ علائقائي سلامتي جي شعبن ۾ تعاون کي فروغ ڏيڻ تي اتفاق ٿيو.
تاجڪ جي بچاءُ واري وزير پاڪ فوج جي پيشيوراڻي صلاحيتن جي واکاڻ ڪئي ۽ علائقائي امن ۽ استحڪام جي حوالي سان ان جي ڪردار کي ساراهيو.
ان موقعي تي آرمي چيف فِيلڊ مارشل عاصم منير علائقائي خوشحالي ۽ استحڪام لاءِ گڏيل ڪوششن جي اهميت تي زور ڏيندي، تاجڪستان سان دفاعي ۽ سلامتي لاڳاپن کي وڌيڪ مضبوط ڪرڻ لاءِ پاڪستان جي عزم جو ورجاءُ ڪيو.
