ڪراچي (ويب ڊيسڪ) وفاقي وزير صحت مصطفىٰ ڪمال چيو آهي ته ايم ڪيو ايم جي بلدياتي نظام بابت آئيني ترميم جلد ايندڙ مهينن ۾ قومي اسيمبلي ۾ پيش ڪئي ويندي، جيڪا منظوري به حاصل ڪندي. هن واضح ڪيو ته 27هين آئيني ترميم جي موقعي تي ڪنهن به قسم جي سياسي سوديبازي نه ڪئي وئي.
ڪراچي ۾ پريس ڪانفرنس دوران مصطفىٰ ڪمال ٻڌايو ته ايم ڪيو ايم طرفان 26هين ترميم وقت آئيني بل پيش ڪيو ويو هو، جيڪو بعد ۾ اسٽينڊنگ ڪميٽي ڏانهن موڪليو ويو. وفاقي حڪومت جي درخواست تي ان وقت معاملو روڪيو ويو، جڏهن ته ايم ڪيو ايم چاهي ته وڌيڪ وزارتون ۽ مراعاتون طلب ڪري سگھي ٿي، پر ان جي بدران عوامي مسئلن جي حل لاءِ هڪ نڪتي بلدياتي ترميمي بل تي زور ڏنو.
هن چيو ته مسلم ليگ (ن) سان ان بل تي معاهدو ڪيو ويو، ۽ مختلف سياسي جماعتن جي تعاون سان ان کي اڳتي وڌايو ويو. پيپلز پارٽي شروع ۾ 27هين ترميم ۾ بل کي شامل ڪرڻ لاءِ تيار نه هئي، پر بعد ۾ وزيراعظم، ڪابينا، مسلم ليگ (ن)، چودھري سالڪ، پي ٽي آءِ ۽ پيپلز پارٽي جي دوستن جي حمايت سان ايم ڪيو ايم جي ترميمي بل کي 27هين ترميم ۾ شامل ڪيو ويو.
مصطفىٰ ڪمال ٻڌايو ته اسٽينڊنگ ڪميٽي ۾ 6 ڪلاڪ بحث ٿيو، جتي حڪومت واضح ڪيو ته ترميم ۾ فوج ۽ عدليه بابت به تبديليون شامل آهن. پنجاب جيڪو بل پاس ڪيو آهي، اهو اصل ۾ ايم ڪيو ايم جو ئي بل آهي، جيڪو سندن موقف جي مڪمل تائيد آهي.
هن چيو ته جيڪڏهن بل ڪابينا ۾ بحث هيٺ نه آيو ته استعيفيٰ ڏيڻ جو ارادو هو، ڇو ته عوامي حقن جي ڳالهه ڪرڻ ئي سندن نصب العين آهي. مظاهرن دوران ايم ڪيو ايم پاڪستاني عوام جو آواز ايون تائين پهچايو.
وفاقي وزير چيو ته 70 سالن کان فوج کي پنهنجي ماڻهن خلاف استعمال ڪيو ويو آهي، جيڪو قومي سلامتي جو مسئلو آهي. وفاق کي بلوچستان جي ماڻهن جي محرومين ختم ڪرڻ لاءِ قدم کڻڻ گهرجن. هن اين ايف سي ايوارڊ جي ورهاست تي تنقيد ڪندي چيو ته پي ايف سي جو ڪو وجود ئي ناهي، جيڪو صوبن اندر وسيلن جي منصفانه ورهاست لاءِ ضروري آهي.
