ڪراچي(اسٽاف رپورٽر) سنڌ اسيمبلي ۾ جمعي جي روز پيپلز پارٽي جي 58هين يومِ تاسيس جي موقعي تي هڪ اهم قرارداد گڏيل طور منظور ڪئي وئي، جنهن ۾ شهيد ذوالفقار علي ڀٽو ۽ شهيد بينظير ڀٽو کي ڀرپور ڀيٽا پيش ڪئي وئي ۽ 1973ع جي بحال ٿيل آئيني نظام، 18هين ترميم، صوبائي خودمختياري ۽ اين ايف سي ايوارڊ ۾ صوبن جي حصي تي ڪنهن به قسم جي سمجهوتي کي رد ڪندي سنڌ جي وحدت، سالميت ۽ حقن جي تحفظ جو عزم ڪيو ويو۔
قرارداد پيپلز پارٽي سنڌ جي صدر نثار احمد کهوڙو پيش ڪئي، جنهن کي ايوان متفقه طور منظور ڪيو۔ قرارداد جي متن ۾ چيو ويو ته شهيد ڀٽو عوام کي “روٽي، ڪپڙا ۽ مڪان” جو نعرو ڏئي ملڪ کي متفقه آئيني فريم ورڪ ڏنو، جنهن سان وفاق ۽ صوبن جي وچ ۾ اختيارن جو توازن قائم ٿيو۔ شهيد بينظير ڀٽو به جمهوريت ۽ عوامي حقن لاءِ جان جو نذرانو پيش ڪيو۔
قرارداد ۾ وڌيڪ چيو ويو ته صدر آصف علي زرداري ۽ چيئرمين بلاول ڀٽو زرداري جي قيادت ۾ پيپلز پارٽي پنهنجي منشور ۽ ورثي تي قائم آهي۔ آئيني 18هين ترميم، صوبائي خودمختياري ۽ اين ايف سي ايوارڊ تحت صوبن جا حصا سنڌ جي عوام جي حقن ۽ اتحاد جي ضمانت آهن، جن تي ڪو به سمجهوتو نه ڪيو ويندو۔
نثار کهوڙي خطاب ڪندي چيو ته شهيد ڀٽو ون مين ون ووٽ ذريعي عوام کي طاقت جو سرچشمو ثابت ڪيو ۽ غريب ۽ وچولي طبقي کي مضبوط ڪيو۔ هن چيو ته سنڌ کي ٽوڙڻ جي منفي سوچ کي 1970ع کان 2025ع تائين رد ڪيو ويو آهي ۽ رد ڪيو ويندو۔
اڳوڻي سنڌ جي وڏي وزيرسيد قائم علي شاهه چيو ته ايوب خان جي آمريت ۾ عوام کي ڳالهائڻ جو حق نه هو، ان دور ۾ شهيد ڀٽو جمهوريت لاءِ جدوجهد ڪئي ۽ ملڪ کي 1973ع جو متفقه آئين ڏنو۔ اسيمبلي جي ميمبر امداد پتافي چيو ته جمهوريت لاءِ سڀ کان وڌيڪ قربانيون پيپلز پارٽي ڏنيون آهن، جڏهن ته خيرالنساء مغل چيو ته شهيد ڀٽو عوام کي آواز ڏنو ۽ پارٽي اڄ به ڀٽو ۽ بينظير جي منشور تي قائم آهي۔
قرارداد تي بحث کان پوءِ ايوان ان کي متفقه طور منظور ڪيو ۽ اجلاس سومر تائين ملتوي ڪيو ويو۔
