بنون (ويب ڊيسڪ) بنون ۾ ميران شاهه روڊ تي فلور ملز جي ويجهو اسسٽنٽ ڪمشنر اُتر وزيرستان جي گاڏي تي مسلح ماڻهن فائرنگ ڪري ڏني، جنهن جي نتيجي ۾ اسسٽنٽ ڪمشنر ۽ ٻه پوليس اهلڪار سميت چار ڄڻا شهيد ٿي ويا. ابتدائي اطلاعن موجب هڪ ٻيو شخص به شهيد ٿيو آهي، جڏهن ته حملو ڪندڙ زخمي اهلڪارن کان هٿيار به کسي ويا ۽ گاڏي کي باهه ڏئي ساڙي ڇڏيو.
اطلاع ملندي ئي پوليس جي نفري واقعي واري هنڌ پهتي، شاهديون گڏ ڪيون ۽ لاش ۽ زخمي اسپتال منتقل ڪيا. پوليس موجب حملو اوچتو ڪيو ويو ۽ دهشتگرد فرار ٿيڻ ۾ ڪامياب ٿي ويا.
خيبرپختونخوا جي وڏي وزير محمد سهيل آفريدي واقعي جي سخت مذمت ڪندي چيو ته ملڪ دشمن عنصر اهڙن بزدلاڻي حملن سان قوم جا حوصلو پست نه ٿا ڪري سگهن. هن شهيدن جي قربانين کي خراج عقيدت پيش ڪيو ۽ چيو ته دهشتگردي خلاف جنگ وڌيڪ عزم سان جاري رهندي. وزيراعليٰ آءِ جي پوليس کان تفصيلي رپورٽ طلب ڪئي ۽ زخمين کي بهترين طبي امداد فراهم ڪرڻ جي هدايت ڪئي.
