نيويارڪ (ويب ڊيسڪ) گڏيل قومن جي جنرل اسيمبلي ۾ هڪ اهم قرارداد وڏي اڪثريت سان منظور ڪئي وئي آهي، جنهن ۾ اسرائيلي فوجن کي والاريل فلسطيني علائقن مان نڪرڻ جو مطالبو ڪيو ويو آهي. قرارداد جو عنوان “فلسطين جي سوال جو پرامن حل” رکيو ويو، جنهن جي حق ۾151 ملڪن ووٽ ڏنو، 11 مخالفت ڪئي ۽ 11 ووٽنگ کان پاسو ڪيو.
قرارداد ۾ زور ڏنو ويو آهي ته وچ اوڀر ۾ امن عمل بابت سڀني اهم معاملن تي قابلِ اعتماد ڳالهين جي فوري شروعات ڪئي وڃي ۽ ماسڪو ۾ هڪ عالمي امن ڪانفرنس سڏجي. جنرل اسيمبلي اسرائيل کان مطالبو ڪيو آهي ته هو عالمي قانونن جي مڪمل پاسداري ڪري، غير قانوني قبضو ختم ڪري، نئين آبادڪاري روڪي ۽ والاريل فلسطيني علائقن مان سڀني يهودي آبادڪارن کي نيڪالي ڏي.
قرارداد ۾ وڌيڪ چيو ويو آهي ته غزه ۾ ڪنهن به قسم جي آباديائي يا جاگرافيائي تبديلي قبول نه ڪئي ويندي، ۽ غزه ۽ اولهه ڪنارو فلسطيني اٿارٽي جي هيٺ متحد ٿيڻ گهرجي. ان سان گڏ اسرائيل کي 1967 کان قبضو ڪيل سڀني فلسطيني علائقن مان نڪرڻ جو پابند ڪيو ويو آهي، جيئن فلسطيني عوام پنهنجو بنيادي حق ــ حقِ خود اراديت ــ استعمال ڪري سگهن.
بحث دوران پاڪستان جي مستقل مندوب اسامه افتخار احمد چيو ته دنيا کي هاڻي پنهنجا واعدا عمل ۾ تبديل ڪرڻا پوندا. هن واضع ڪيو ته پاڪستان فلسطيني عوام جي آزادي، خودمختياري، امن ۽ انصاف جي جدوجهد جي مڪمل حمايت ڪري ٿو.
پاڪستاني مندوب زور ڏنو ته غزه ۾ مڪمل سيزفائر، اسرائيلي فوجن جو انخلا، انساني امداد جي بنا رڪاوٽ فراهمي ۽ غزه جي فوري ٻيهر تعمير لازمي آهي. هن وڌيڪ چيو ته والاريل علائقن ۾ ڪا به جبري تبديلي، ورهاست، الحاق يا جبري بي دخلي قبول نه ڪئي ويندي.
اسامه افتخار احمد اهو به چيو ته پائيدار امن جو واحد سياسي رستو اهو آهي ته 1967 جي سرحدن تي هڪ خودمختار، مڪمل، آزاد ۽ جغرافيائي طور تي ٻڌل فلسطيني رياست جو قيام ٿئي، جنهن جو گاديءَ جو هنڌ مشرقي يروشلم (القدس الشريف) هجي.
