نيويارڪ (ويب ڊيسڪ) گڏيل قومن ۾ ڊنمارڪ جي سفير ڪرسٽينا مارڪس لاسن چيو آهي ته افغانستان ۾ پابندي شده تنظيم ٽي ٽي پي جا لڳ ڀڳ 6 هزار جنگجو موجود آهن، جيڪي خطي جي سلامتي لاءِ سنجيده خطرو بڻجي چڪا آهن.
اقوام متحده جي اجلاس دوران خطاب ڪندي سفير جو چوڻ هو ته طالبان حڪومت ٽي ٽي پي کي لاجسٽڪ سهولتون ۽ تعاون فراهم ڪري رهي آهي، جنهن سبب خطي ۾ دهشتگردي جا خطرا وڌيڪ وڌي رهيا آهن.
هن واضح ڪيو ته ٽي ٽي پي افغان سرزمين استعمال ڪندي پاڪستان ۾ ڪيترائي حملا ڪيا، جن جي نتيجي ۾ پاڪستان کي وڏو جاني نقصان برداشت ڪرڻو پيو. هي صورتحال نه رڳو پاڪستان پر سڄي خطي جي امن ۽ استحڪام لاءِ ڳڻتي جو سبب آهي.
ڊنمارڪ جي سفير عالمي برادري تي زور ڏنو ته هو هن وڌندڙ خطري جو سنجيدگي سان نوٽيس وٺي ۽ افغانستان ۾ دهشتگرد گروپن جي محفوظ پناهه گاهن جي خاتمي لاءِ گڏيل قدم کڻن.
