اسلام آباد(ويب ڊيسڪ) سينيٽر فيصل واوڊا چيو آهي ته رياست واضح ڪري ڇڏيو آهي ته هاڻي پاڪستان، فوج يا سپه سالار خلاف ڪنهن به قسم جي مخالف مهم، الزام يا بدنامي برداشت نه ڪئي ويندي. سوشل ميڊيا تي جاري بيان ۾ هن چيو ته رياست اندروني ۽ ٻاهرين دشمنن جي سوالن جا جواب پاڻ ڏئي رهي آهي ۽ قومي سلامتي خلاف هلندڙ بيانيي کي سختي سان روڪيو ويندو.
فيصل واوڊا چيو ته جيڪي ماڻهو ملڪ ۽ رياستي ادارن خلاف بيانيو اختيار ڪن ٿا، اهي دشمن قوتن جي موقف کي هٿي ڏين ٿا ۽ اهڙو عمل غداري ۾ اچي ٿو. هن چيو ته رياست جو جواب واضح آهي ته ملڪ جي سلامتي، فوج ۽ سپه سالار خلاف ڳالهائڻ هاڻي ڪنهن صورت ۾ برداشت نه ڪيو ويندو.
هن چيو ته ڪجهه سياسي حلقا ۽ سوشل ميڊيا تي سرگرم ماڻهو منظم طريقي سان رياست مخالف بيانيي کي وڌائي رهيا آهن، جڏهن ته انهن مان ڪيترائي پنهنجي قيادت جي بيانن کي به کليل طور تي سپورٽ نٿا ڪن، جنهن سان سندن موقف ۾ تضاد ظاهر ٿئي ٿو.
فيصل واوڊا چيو ته رياست جو پيغام انهن ماڻهن لاءِ به واضح آهي جيڪي ملڪ ۾ انتشار پيدا ڪرڻ يا رياستي ادارن خلاف مهم هلائڻ جي ڪوشش ڪن ٿا. هن چيو ته اهڙن عملن جي نتيجي ۾ سخت قانوني ڪارروائي ٿي سگهي ٿي ۽ رياست ڪنهن به قسم جي انتشار کي روڪڻ لاءِ تيار آهي.
هن چيو ته 9 مئي جي واقعن ۾ ملوث ماڻهن بابت اڳ ئي خبردار ڪيو ويو هو، ۽ هاڻي انهن خلاف قانوني عملدرآمد جو وقت اچي چڪو آهي. هن چيو ته ملڪ دشمن قوتن کي روڪڻ لاءِ رياست وڌيڪ سخت قدم کڻڻ لاءِ تيار آهي ۽ پاڪستان جي دشمنن کي قانون جي گرفت ۾ آڻڻ جو عمل شروع ٿي چڪو آهي.
فيصل واوڊا چيو ته ملڪ کي عدم استحڪام ڏيارڻ جي ڪوشش ڪندڙن لاءِ رياست جو پيغام انتهائي واضح آهي ۽ هاڻي پاڪستان خلاف ڪنهن به قسم جي مهم يا بيانيي کي نظرانداز نه ڪيو ويندو.
