لاهور(ويب ڊيسڪ) سي ٽي ڊي پنجاب هڪ وڏي اينٽي ٽيرر آپريشن دوران ڀارتي خفيه ايجنسي را سان لاڳاپيل 12 دهشتگردن کي گرفتار ڪري ورتو، جن جي قبضي مان وڏي تعداد ۾ هٿيار، بارودي مواد، ڊيٽونيٽر، آءِ اي ڊي بم، حفاظتي فيوز وائر، روڪ رقم ۽ موبائل فون هٿ ڪيا ويا.
سي ٽي ڊي موجب گرفتار دهشتگردن وٽان حساس ادارن ۽ حساس هنڌن جون تصويرون، وڊيوز ۽ لوڪيشنز پڻ هٿ ڪيون ويون، جڏهن ته هڪ مدرسو ۽ هڪ ميلي جي سرگرمين جون تصويرون ۽ وڊيوز به ملي آهي، جيڪي امڪاني دهشتگردي جي منصوبابندي ڏانهن اشارو ڪن ٿيون.
اختيارين موجب فيصل آباد مان گرفتار ٿيل دهشتگرد پنجاب ۾ خوف پکيڙڻ سان گڏ مذهبي نفرت وڌائڻ جا منصوبا ٺاهي رهيا هئا. لاهور مان گرفتار ٿيل دهشتگردن ۾ ديپ سنگھ، عظمت، فيضان، نبيل ابرار ۽ عثمان سرفراز شامل آهن، جڏهن ته فيصل آباد مان دانش کي گرفتار ڪيو ويو.
بهاولپور مان فتنہ الہندوستان گروپ سان لاڳاپيل رجب، هاشم، ثاقب ۽ عارف کي به حراست ۾ ورتو ويو آهي.
سي ٽي ڊي جو چوڻ آهي ته عادل نالي هڪ فيس بڪ آءِ ڊي، جيڪا ڀارت ۾ را جي نگراني هيٺ هلائي پئي وئي، انهن دهشتگردن جي گرفتاري ۾ اهم ڪردار ادا ڪيو. ابتدائي جاچ ۾ ظاهر ٿيو آهي ته گرفتار نيٽ ورڪ کي ڀارتي خفيه ايجنسي طرفان مالي مدد پڻ ملي رهي هئي.
دهشتگردن خلاف ڪيس داخل ڪري وڌيڪ جاچ شروع ڪئي وئي آهي، جڏهن ته نيٽ ورڪ جي ٻين سهولتڪارن جي ڳولا به جاري آهي.
