اسلام آباد(ويب ڊيسڪ) جسٽس طارق محمود جهانگيري جي مبينا ڊگري تنازع بابت هائر ايجوڪيشن ڪميشن (ايچ اي سي) پنهنجي تفصيلي رپورٽ اسلام آباد هاءِ ڪورٽ ۾ جمع ڪرائي آهي، جنهن ۾ واضح ڪيو ويو آهي ته ڊگري جي تصديق ۽ اجرا مڪمل طور تي جامعہ ڪراچي جو اندروني معاملو آهي ۽ ايچ اي سي جو ان عمل سان ڪو به تعلق ناهي. رپورٽ موجب جسٽس طارق جي ڊگري ڪڏهن به ايچ اي سي وٽ تصديق لاءِ پيش نه ڪئي وئي ۽ نه ئي ان سلسلي ۾ ڪا درخواست غور هيڊ آهي. ايچ اي سي جو موقف آهي ته هو ڪنهن به اهڙي ڊگري جي تصديق نٿو ڪري سگهي جيڪا لاڳاپيل يونيورسٽي جي رڪارڊ ۾ موجود نه هجي.
ڪراچي يونيورسٽي پنهنجي جواب ۾ ڊگري رد جا سبب بيان ڪندي چيو آهي ته 1989ع ۾ ان فيئر ميانز ڪميٽي طارق محمود تي نقل ڪرڻ ۽ ايگزامنر کي ڌمڪيون ڏيڻ جا الزام ثابت ٿيڻ بعد ٽن سالن جي پابندي لڳائي هئي. فيصلي موجب هو 1992ع ۾ ٻيهر امتحان ڏيڻ جا اهل هئا، پر طارق محمود 1990ع ۾ ئي جعلي انرولمينٽ فارم استعمال ڪري ڊگري حاصل ڪرڻ جي ڪوشش ڪئي، جنهن تي اسلاميه ڪاليج جي جعلي مهر لڳل هئي.
ڪراچي يونيورسٽي جي رڪارڊ موجب انرولمينٽ نمبر 5968/87، جنهن تي طارق محمود جي ڊگري جاري ڪئي وئي، اصل ۾ امتيار احمد نالي شاگرد کي الاٽ ٿيل هو، جڏهن ته 7184/87 وارو انرولمينٽ نمبر به جعلسازي سان حاصل ڪيو ويو. مختلف انرولمينٽ نمبرز ۽ نالن جي بنياد تي مارڪ شيٽون ۽ ڊگري حاصل ڪرڻ جا ثبوت پڻ غلط ثابت ٿيا.
23 مئي 2024 تي شهري عرفان مظهر جي درخواست تي ڪراچي يوينورسٽي ٻيهر رڪارڊ جي جاچ ڪئي، جنهن ۾ ڪنٽرولر امتحانات ٻنهي انرولمينٽ نمبرز کي ناممڪن قرار ڏيندي ڊگري ۽ مارڪ شيٽون غلط قرار ڏنيون. بعد ۾ اسلام آباد هاءِ ڪورٽ جي رجسٽرار پاران 5 جولاءِ 2024 تي اي ميل ذريعي تصديق طلب ڪئي وئي، جنهن جي جواب ۾ ڪراچي يونيورسٽي ڊگري کي غير تصديق قرار ڏيڻ جي باضابطه تصديق ڪئي. اسلاميه ڪاليج جي پرنسپل پڻ واضح ڪيو ته طارق محمود 1984ع کان 1991ع تائين ڪڏهن به ڪاليج جا شاگرد نه رهيا.
