افغان طالبان جي پٺڀرائي سان دهشتگرد معصوم شهرين ۽ ٻارن کي نشانو بڻائي رهيا آهن: عاصم منير
اسلام آباد (ويب ڊيسڪ) چيف آف آرمي اسٽاف ۽ چيف آف ڊي فنس فورسز فيلڊ مارشل سيد عاصم منير قومي علما مشائخ ڪانفرنس ۾ پنهنجي اهم خطاب دوران چيو آهي ته افغان طالبان جي پشت پناهي سان دهشتگرديءَ جي لهر اسان جي معصوم شهرين ۽ ٻارن کي نشانو بڻائي رهي آهي. هن واضح ڪيو ته فتنہ افغانستان مان اچي رهيا آهن، جن ۾ لڳ ڀڳ 70 سيڪڙو افغاني شامل آهن.
قومي علما مشائخ ڪانفرنس جو انعقاد اسلام آباد ۾ ٿيو، جنهن ۾ ملڪ جي مختلف علمن ۽ مشائخن وڏي تعداد ۾ شرڪت ڪئي. فيلڊ مارشل پنهنجي خطاب ۾ ملڪي چيلينجز، دهشتگردي، قومي سلامتي، عالمي سطح تي پاڪستان جي اڀرندڙ حيثيت، جنگي تيارين ۽ علم جي اهميت تي تفصيلي روشني وڌي.
هن قرآن پاڪ جي آيتن ۽ شعري حوالن سان پاڪستان بابت پنهنجو نقطه نظر پيش ڪندي چيو ته الله پاڪ اسلامي ملڪن مان محافظينِ حرمين جو شرف پاڪستان کي عطا ڪيو آهي. هن وڌيڪ چيو ته رياستِ طيبه ۽ پاڪستان جو قيام ڪلموءِ طيبه جي بنياد تي رمضان جي بابرڪت مهيني ۾ ٿيو، ٻنهي رياستن ۾ هڪجهڙائي آهي ڇاڪاڻ ته ربِ ڪائنات هڪ کي خادم الحرمين ۽ ٻئي کي محافظ الحرمين بڻايو.
فيلڊ مارشل عاصم منير چيو ته آپريشن “بنيان المرصوص” دوران الله جي مدد کي محسوس ڪيو ويو. هن زور ڏنو ته ڪنهن به اسلامي رياست ۾ رياست کان سواءِ ڪو به فرد يا گروهه جهاد جو حڪم يا فتويٰ جاري نٿو ڪري سگهي.
هن خبردار ڪيو ته افغانستان کي هاڻي فيصلو ڪرڻو پوندو ته هو فتنہ الخوارج سان گڏ رهندو يا پاڪستان سان. هن چيو ته جيڪي قومون پنهنجي اسلاف جي علمي ۽ فڪري ميراث ۽ قلم جي طاقت کي وساري ڇڏين ٿيون، اهي زبون حالي جو شڪار ٿي وڃن ٿيون.
