مظفرآباد(ويب ڊيسڪ) چيف آف ڊيفنس فورسز فيلڊ مارشل عاصم منير چيو آهي ته ڪشميري عوام جي خواهشن ۽ تقدير مطابق آزاديءَ جو سچ جلد اُڀرندو. هن تحريڪِ آزادي ڪشمير جي شهيدن کي خراجِ عقيدت پيش ڪندي جمون و ڪشمير شهيدن جي يادگار تي گلن جي چادر چاڙهي ۽ شهيدن جي بي مثال جرئت، قرباني ۽ جدوجهد کي ساراهيو.
آءِ ايس پي آر موجب فيلڊ مارشل عاصم منير مظفرآباد جي دوري دوران معززين ۽ اڳوڻن فوجين سان ملاقات ڪئي ۽ ڀارتي غيرقانوني طور تي قبضي هيٺ آيل ڄمون و ڪشمير جي عوام لاءِ پاڪستان جي غير متزلزل سياسي، اخلاقي ۽ سفارتي حمايت جو عزم ورجايو. هن چيو ته ڀارتي ظلم، انساني حقن جون خلاف ورزيون ۽ هندو توا تي ٻڌل زيادتيون ڪشميري عوام جي جائز جدوجهد کي دٻائڻ ۾ ناڪام رهيون آهن.
فيلڊ مارشل جو چوڻ هو ته پاڪستان گڏيل قومن جي سلامتي ڪائونسل جي قراردادن مطابق مسئلي جي منصفاڻي حل تائين هر عالمي فورم تي ڪشمير ڪاز کي اجاگر ڪندو رهندو. هن واضح ڪيو ته پاڪستان پنهنجي ڪشميري ڀائرن ۽ ڀينرن سان مڪمل يڪجهتي جو اظهار جاري رکندو.
هن ڪشمير ۾ مقرر آفيسرن ۽ جوانن جي بلند حوصلن، پيشه ورانه مهارت ۽ جنگي تيارين کي ساراهيو ۽ چيو ته مشڪل آپريشنل حالتن باوجود اعليٰ سطح جي تياري ۽ هم آهنگي برقرار رکڻ ضروري آهي ته جيئن دشمن جي ڪنهن به اشتعال انگيزي جو بروقت ۽ فيصلائتو جواب ڏئي سگهجي.
دوري دوران فيلڊ مارشل عاصم منير هڪ فارورڊ پوسٽ جو معائنو ڪيو ۽ محاذ تي مقرر جوانن سان ملاقات ڪندي چيو ته ڪنهن به جارحيت جو فوري، تيز ۽ مؤثر جواب ڏنو ويندو. هن وڌيڪ چيو ته پاڪستان جون مسلح افواج بدلجندڙ سيڪيورٽي ماحول ۾ روايتي ۽ هائبرڊ خطرن کي منهن ڏيڻ لاءِ مڪمل طور تي تيار آهن.
مظفرآباد آمد تي فيلڊ مارشل جو استقبال ڪمانڊر راولپنڊي ڪور ڪيو.
