اسلام آباد (ويب ڊيسڪ) متحده عرب امارات جو صدر شيخ محمد بن زايد النهيان هڪ روزي تاريخي دوري تي پاڪستان پهتو، جتي نورخان ايئربيس تي وزيراعظم شهباز شريف ۽ فيلڊ مارشل عاصم منير سندس شاندار استقبال ڪيو.
معزز مهمان جي جهاز جي لينڊ ڪرڻ تي پاڪ فضائيه جي جنگي جهازن سلامي پيش ڪئي، جڏهن ته هٿياربند فوج جي چاق و چوبند دستي گارڊ آف آنر ڏنو ۽ 21 توپن جي سلامي پڻ ڏني وئي.
وزيراعظم شهباز شريف ۽ فيلڊ مارشل عاصم منير ڪابينا جي ميمبرن سان گڏ مهمان کي آجيان ڪئي. ان موقعي تي اسحاق ڊار، خواجه آصف، احسن اقبال، عطا تارڙ ۽ ٻيا وزير موجود هئا. وزيراعظم مهمان کي وزيرن جو تعارف پڻ ڪرايو.
يو اي اي صدر سان گڏ هڪ اعليٰ سطحي وفد به پاڪستان پهتو آهي، جنهن دوران ٻنهي ملڪن ۾ اهم معاشي ۽ واپاري معاهدن تي منظوري ڏني ويندي.
شيخ محمد بن زايد النهيان جو هي دورو ٻنهي ملڪن جي سفارتي لاڳاپن ۾ نئين باب جي حيثيت رکي ٿو ۽ ٻنهي قومن جي برادرانه ۽ ديرينه تعلقن جي عڪاسي ڪري ٿو.
صدر آصف علي زرداري، وزيراعظم شهباز شريف ۽ ٻين اعليٰ شخصيتن سان ملاقاتون پڻ شيڊول آهن. ان کان اڳ اسلام آباد ۾ انتظاميه عام موڪل جو اعلان ڪيو هو.
پرڏيهي کاتي موجب، اماراتي صدر سان گڏ وزرا ۽ سينيئر عملدارن تي مشتمل وفد به آهي، جنهن دوران ٻطرفي لاڳاپن، علائقائي ۽ عالمي معاملن تي ڳالهيون ٿينديون.
ٻئي طرف، وزيراعليٰ پنجاب مريم نواز شريف اماراتي صدر جي دوري جي آجيان ڪندي چيو ته پاڪستان ۽ متحده عرب امارات جا لاڳاپا لازوال ۽ بي مثال آهن. هن چيو ته صدر محمد بن زايد النهيان جو دورو ٻنهي ملڪن جي لاڳاپن کي وڌيڪ مضبوط ڪندو.
