راولپنڊي(ويب ڊيسڪ) چيـف آف ڊيـفنس فورسز فـيلڊ مارشل سيد عاصم منير چيو آهي ته ملڪ جي ترقي ۽ استحڪام لاءِ ذاتي ۽ مفاداتي سياسي ايجنڊن کي رد ڪرڻ ضروري آهي، جڏهن ته منفي پروپيگنڊا جي خاتمي ۾ سول سوسائٽي جو ڪردار انتهائي اهم آهي۔
آءِ ايس پي آر جي بيان موجب فـيلڊ مارشل عاصم منير جنرل هيڊڪوارٽرز (جي ايڇ ڪيو) ۾ بلوچستان بابت 18هين نيشنل ورڪشاپ ۾ شرڪت ڪندڙن سان ملاقات ڪئي ۽ تفصيلي خيالن جو اظهار ڪيو۔ هن ورڪشاپ ۾ بلوچستان جي سماجي ۽ معاشي ترقي ۽ پاڪستان لاءِ ان جي تزويراتي اهميت تي بحث ڪيو ويو۔
فيلڊ مارشل بلوچستان جي عوام جي حب الوطني ۽ ثابت قدمي کي ساراهيندي چيو ته صوبو پاڪستان جي خوشحالي ۽ ترقي ۾ مرڪزي حيثيت رکي ٿو۔ هن وفاقي ۽ صوبائي حڪومتن جي وسيع تر قدمن جي واکاڻ ڪندي عوامي فلاح تي ٻڌل پاليسين تي زور ڏنو، جن جو مقصد صوبائي معاشي امڪانن کي بروءِ ڪار آڻڻ ۽ سماجي حالتن کي بهتر بڻائڻ آهي۔
فيلڊ مارشل عاصم منير سول سوسائٽي جي تعميري ڪردار کي به ساراهيو ۽ چيو ته منفي پروپيگنڊا کي روڪڻ ۾ انهن جون ڪوششون اهم آهن۔ هن زور ڏنو ته پائيدار ترقي لاءِ ذميوار رويي ۽ قومي مفاد کي اوليت ڏيڻ لازمي آهي، جڏهن ته ذاتي ۽ مفاداتي سياسي ايجنڊن کي رد ڪرڻ ئي ملڪ جي استحڪام جو رستو آهي۔
فيلڊ مارشل چيو ته بلوچستان جو مستقبل ان جي رهواسين جي ڊگهي مدي واري خوشحالي سان جڙيل آهي۔ هن خبردار ڪيو ته ڀارت جي حمايت يافته پراڪسي عناصر صوبو ۾ تشدد کي هوا ڏئي رهيا آهن ۽ ترقي جي عمل کي برباد ڪرڻ جي ڪوشش ڪري رهيا آهن، پر سيڪيورٽي فورسز انهن مذموم عزمن کي ناڪام بڻائينديون ۽ بلوچستان کي دهشتگردي ۽ بدامني کان پاڪ ڪيو ويندو۔
هن وڌيڪ چيو ته پاڪستان علائقائي امن ۽ استحڪام لاءِ پرعزم آهي ۽ ملڪ جي سالميت جي ڪنهن به قسم جي خلاف ورزي، سڌي يا اڻ سڌي، جو سخت ۽ فيصلو ڪن جواب ڏنو ويندو۔
فيلڊ مارشل عاصم منير واضح ڪيو ته پاڪستان جون هٿياربند فوجون شهرين جي جان ۽ مال جي تحفظ لاءِ مڪمل طور تي پرعزم آهن۔
اجلاس جي آخر ۾ سوال جواب جو سيشن به ٿيو، جنهن ۾ فـيلڊ مارشل شرڪائن جي سوالن جا جواب ڏنا ۽ بلوچستان جي ترقي ۽ سيڪيورٽي بابت جاري قدمن تي وڌيڪ روشني وڌي۔
