سکر (بيورو رپورٽ) سنڌ حڪومت ڪچي جي علائقن ۾ بدنام زمانه ڏوهارين ۽ ڌاڙيلن خلاف گرينڊ آپريشن جو اعلان ڪري ڇڏيو آهي. صوبائي گهرو وزير ضياالحسن لنجار چيو آهي ته آپريشن شروع ٿي چڪو آهي ۽ ڌاڙيلن جو مڪمل صفايو ڪيو ويندو، البت جيڪي هٿيار اڇلائي سرڪار آڏو سرينڊر ڪندا، انهن کي هڪ موقعو ضرور ڏنو ويندو.
گهرو وزير سکر پهتو، جتي ڊي آءِ جي آفيس ۾ پوليس جي خاص دستي سلامي پيش ڪئي. هن امن و امان بابت جائزه اجلاس جي صدارت ڪئي، جنهن ۾ آءِ جي سنڌ جاويد عالم اوڍو پوليس جي ڪاررواين ۽ ڪامياب هدفن بابت تفصيلي بريفنگ ڏني.
آءِ جي سنڌ ٻڌايو ته ڪچي ۽ پڪي علائقن ۾ پوليس جا دستا مڪمل طور تي متحرڪ آهن، ڌاڙيل جا ٺڪاڻا مسمار ڪيا پيا وڃن ۽ سندن سهولتڪارن تي به سخت نڪيل وڌي وئي آهي. جديد ٽيڪنالاجي ۽ انٽيليجنس بيسڊ آپريشنز ذريعي ڏوهارين جو پيڇو جاري آهي، جڏهن ته ڪچي ۾ پوليس جي مستقل موجودگي سان ڏوهن جو خاتمو ممڪن بڻجي رهي آهي.
ضياالحسن لنجار چيو ته پوليس جي ڪارڪردگي تسلي بخش ۽ قابلِ تحسين آهي. ڪچي ۽ پڪي جي علائقن ۾ ڏوهن جي خاتمي لاءِ مربوط حڪمت عملي اختيار ڪئي ويندي، ڌاڙيلن ۽ سندن سهولتڪارن خلاف ڪارروايون وڌيڪ مؤثر بڻايون وينديون. هن واضح ڪيو ته رياستي رٽ کي چيلينج ڪندڙن سان سختي سان منهن ڏنو ويندو، عوام جي جان ۽ مال جي تحفظ ۾ ڪا به ڪوتاهي برداشت نه ڪئي ويندي.
اجلاس کان پوءِ ميڊيا سان ڳالهائيندي گهرو وزير چيو ته ڪچي جي ڌاڙيلن خلاف گرينڊ آپريشن اڄ کان ئي شروع ٿي ويو آهي. جيڪي ڌاڙيل سرڪار آڏو هٿيار اڇلائيندا، انهن کي هڪ موقعو ڏنو ويندو، پر جيڪي مزاحمت ڪندا ۽ پاڻ کي طاقتور سمجهندا، انهن خلاف سخت ڪارروايون ٿينديون ۽ کين نيست و نابود ڪيو ويندو.
فوج جي ضرورت بابت سوال تي ضياالحسن لنجار چيو ته هن وقت فوج جي ضرورت ناهي، سنڌ پوليس وٽ ڌاڙيلن سان منهن ڏيڻ جي مڪمل صلاحيت موجود آهي، جڏهن ته رينجرز اڳ ئي ساڻس گڏ آهي. هن اميد ظاهر ڪئي ته ڌاڙيلن جو مڪمل صفايو ٿي ويندو.
