تہران(ويب ڊيسڪ) ايران ۾ تازن هنگامن ۾ ملوث هڪ گروپ جي اڳواڻ عورت اعتراف ڪيو آهي ته هن ملڪ ۾ بدنظمي ۽ تڪرار وڌائڻ لاءِ اسرائيلي وزيراعظم بنيامين نيتن ياهو سان سڌا رابطا ڪيا هئا۔
ايراني ميڊيا جي رپورٽ موجب، تهران ۾ گرفتار ٿيل ماڻهن کان جاچ دوران، هڪ عورت جيڪا 7 مختلف ٻوليون ڄاڻي ٿي، اعتراف ڪيو ته هن ملڪ ۾ هنگامهن ۽ ڇڪتاڻ پيدا ڪرڻ لاءِ رابطا ڪيا۔
ايراني اختيارين ٻڌايو ته گرفتار عورت تسليم ڪيو آهي ته هنگامن دوران هوءَ پهلوي جي حامين سوشل ميڊيا نيٽورڪ جي سربراهه ۽ 7 آڪٽوبر 2023 کان پوءِ غزه ۾ شروع ٿيل وحشياڻي ڪاررواين دوران سڌي طرح اسرائيل حامي حلقن سان رابطي ۾ هئي۔ عورت وڌيڪ تصديق ڪئي ته هن جي ڪوششن ۾ نيتن ياهو تائين سڌو پيغام پهچائڻ به شامل هو۔
رپورٽ ۾ چيو ويو آهي ته ٻيا ٻه گرفتار ٿيل ماڻهو به اعتراف ڪري چڪا آهن ته هنن ملڪ ۾ ڇڪتاڻ ۽ حڪومت خلاف نفرت وڌائڻ لاءِ هڪ پوليس اسٽيشن کي نشانو بڻايو۔ ساڳي طرح هڪ ٻئي جوابدار اعتراف ڪيو ته هن ڏکڻ تهران ۾ پنهنجي اپارٽمينٽ مان قانون لاڳو ڪندڙ اهلڪارن ۽ شهرين تي شاٽ گن سان فائرنگ ڪئي۔
ايراني چيف جسٽس غلام حسين محسن گرفتار ماڻهن جا بيان رڪارڊ ڪيا، جن مان هڪ جوابدار ٻڌايو ته هن پنهنجي ڪار پوليس اهلڪارن تي چڙهائي هئي، جڏهنتہ ٻين ٽن جوابدارن چيو ته هنن قانون لاڳو ڪندڙ اهلڪارن ۽ شهرين جي مٿان ڪنڪريٽ بلاڪ اڇلايا هئا۔
چيف جسٽس غلام حسين محسن چيو ته سڀئي جوابدار سڌي يا اڻ سڌي طرح غير ملڪي خفيه ايجنسي سان ڳنڍيل هئا ۽ تازن هنگامن دوران جن ماڻهن شهرين کي اڪسايو ۽ امن خراب ڪيو، انهن کي جاچ ذريعي انصاف جي ڪٽهڙي ۾ آندو ويندو۔
واضح رهي ته هن مهيني جي شروعات ۾ تهران جي گرينڊ بازار ۾ ڪجهه واپارين طرفان مهانگائي، پابندين ۽ ٻين مسئلن خلاف پرامن احتجاج ڪيو ويو هو، پر هڪ هفتي بعد 8 جنوري تي اوچتو سڄي ملڪ ۾ پرتشدد احتجاج پکڙجي ويو۔ ايران الزام لڳايو هو ته انهن پرتشدد احتجاجن ۽ هنگامن جي پويان اسرائيل ۽ آمريڪا جو هٿ آهي۔
