خاران (ويب ڊيسڪ): بلوچستان جي ضلعي خاران ۾ فتنته الہندوستان سان لاڳاپيل دهشتگردن سٽي ٿاڻي ۽ بينڪن تي حملو ڪري لکين رپيا ڦري ورتا، جڏهن ته سيڪيورٽي فورسز جي وقت تي ۽ سخت ڪارروائي ۾ 12 دهشتگرد مارجي ويا.
آئي ايس پي آر موجب 15 کان 20 دهشتگرد خاران سٽي ۾ داخل ٿي ڪيترن ئي هنڌن تي دهشتگردي جون ڪارروايون ڪيون.
دهشتگردن سٽي پوليس اسٽيشن، نيشل بئنڪ ۽ حبيب بئنڪ تي حملو ڪري لڳ ڀڳ 34 لک رپيا ڦري ورتا.
سيڪيورٽي فورسز جي جوابي ڪارروائي ۾ دهشتگرد پسپا ٿي ويا ۽ ڪليئرنس آپريشن دوران ٽن مختلف هنڌن تي 12 دهشتگرد ماريا ويا.
پاڪ فوج جي ترجمان جو وڌيڪ چوڻ هو ته دهشتگردن جو ارادو پوليس اسٽيشن ۾ ماڻهن کي يرغمال بڻائڻ هو، پر فورسز ان منصوبي کي ناڪام بڻائي ڇڏيو. علائقي ۾ دهشتگردن جي موجودگي بابت شڪ کي ختم ڪرڻ لاءِ آپريشن جاري آهي.
آءِ ايس پي آر موجب پاڪ فوج ۽ قانون لاڳو ڪندڙ ادارا عزمِ استحڪام جي وژن تحت دهشتگردي جي مڪمل خاتمي تائين آپريشن جاري رکندا.
بيان ۾ چيو ويو آهي ته غير ملڪي سرپرستي ۾ ٿيندڙ دهشتگردي کي پاڙ کان اکوڙڻ لاءِ مهلڪ ڪارروايون جاري رهنديون.
