راولپنڊي: سيڪيورٽي فورسز 10 کان 13 سيپٽمبر دوران خيبرپختونخواھ ۾ 2 مختلف ڪارروائين ۾ ڀارتي پراڪسي فتنھ الخوارج سان لاڳاپيل 35 خوارج کي ماري ڇڏيو جڏھن تھ 12 جوان بھ وطن تي قربان ٿي ويا.
آئي ايس پي آر موجب خيبرپختونخواھ جي ضلعي باجوڙ ۾ خوارج جي موجودگي جي اطلاع تي سيڪيورٽي فورسز انٽيليجنس جي بنياد تي آپريشن ڪيو، ڪارروائي دوران جوانن خوارج جي ٺڪاڻن کي موثر انداز ۾ نشانو بڻايو ۽ ڇتي فائرنگ جي وٺ ۾ ڀارتي سرپرستي ۾ سرگرم 22 خوارج کي ماري ڇڏيو.
آئي ايس پي آر ٻڌايو تھ ھڪ ٻئي ڇڪتاڻ ۾ ڏکڻ وزيرستان ۾ ٿي جتي وڌيڪ 13 خوارج کي سيڪيورٽي فورسز ماري ڇڏيو پر ڇتي فائرنگ جي ڏي وٺ ۾ 12 جوانن شھادت ماڻي.
آئي ايس پي آر موجب ڀارتي سرپرستي ۾ سرگرم مارجي ويل خوارجن کان ھٿيار ۽ گولا بارود بھ ھٿ ڪيا ويا جيڪي انھن علائقن ۾ ڪيترين کي دھشتگرد ڪارروائين ۾ ملوث ھئا.
آئي ايس پي آر جو وڌيڪ چوڻ ھو تھ انٽيليجنس رپورٽس بنا ڪنھن شڪ جي افغان شھرين کي اھڙين ڪاررائين ۾ سڌو سنئون ملوث ھئڻ جي تصديق ڪئي آھي، فتھ الخوارج دھشتگردن پاران افغان سرزمين جو پاڪستان خلاف استعمال ٿيڻ ھڪ سنگين ڏکوئيندڙ آھي، پاڪستان اميد ڪري ٿو تھ عبوري افغان حڪومت پنھنجيون ذميواريون پوري ڪندي ۽ پنھنجي سرزمين کي پاڪستان مخالف دھشتگرد سرگرمين لاءِ استعمال نھ ٿيڻ ڏيندي.
پاڪ فوج موجب علاقي ۾ ڀارتي سرپرستي ۾ موجود ڪنھن بھ خوارج کي ختم ڪرڻ لاءِ ڪليئرنس آپريشن جاري آھي ڇو تھ پاڪستان جي سيڪيورٽي فورسز ملڪ مان ڀارتي سرپرست دھشتگردي جي ناسور کي جڙ کان ختم ڪرڻ لاءِ پرعزم آھي ۽ اسانجي بھادر جوانن جي اھڙيون قربانيون اسانجي عزم کي وڌيڪ مضبوط ڪن ٿيون.
