لاهور (ويب ڊيسڪ) جماعت اسلامي پاڪستان جي امير حافظ نعيم الرحمان وزيراعظم شهباز شريف طرفان آمريڪي صدر ڊونلڊ ٽرمپ جي دعوت تي غزہ لاءِ قائم بورڊ آف پيس ۾ پاڪستان جي شموليت جي فيصلي کي سختي سان رد ڪري ڇڏيو آهي.
سماجي رابطن جي ويب سائيٽ “ايڪس” تي جاري بيان ۾ حافظ نعيم الرحمان چيو ته حڪومت جو فيصلو ناقابل قبول آهي، ڇو ته ٽرمپ جو بورڊ آف پيس نوآبادياتي نظام جي نئين صورت آهي، جنهن ۾ عراق کي تباهه ڪندڙ ٽوني بليئر جهڙا ڏوهاري شامل آهن.
هن چيو ته هي بورڊ فلسطيني عوام جي وسيلن ۽ زمينن تي قبضو ڪرڻ جو نئون طريقو آهي، جڏهن ته تعمير نو جي نالي تي غزہ تي آمريڪي قبضي کي ڪنهن به صورت ۾ قبول نه ڪيو ويندو.
حافظ نعيم الرحمان وڌيڪ چيو ته پرڏيهي وزارت جو اهو مؤقف غلط آهي ته پاڪستان سلامتي ڪائونسل جي قرارداد تحت غزه امن منصوبي جي حمايت جو اعلان ڪيو آهي. هن ياد ڏياريو ته ٽرمپ پاڻ چيو آهي ته سندس بورڊ آف پيس مستقبل ۾ گڏيل قومن جي جاءِ وٺي سگهي ٿو، اهڙي صورتحال ۾ پاڪستان جي شموليت جو ڪهڙو جواز آهي؟
امير جماعت اسلامي واضح ڪيو ته پاڪستان جي فوج کي ڪنهن به صورت ۾ غزه نه موڪليو وڃي.
