اسلام آباد(ويب ڊيسڪ) پاڪستان سميت مصر، اردن، متحده عرب امارات، انڊونيشيا، ترڪي، سعودي عرب ۽ قطر جي پرڏيهي وزيرن گڏيل پڌرنامو جاري ڪندي غزه بورڊ آف پيس ۾ شامل ٿيڻ جو فيصلو ڪيو آهي.
پڌرنامي ۾ چيو ويو آهي ته سڀئي ملڪ پنهنجي آئيني ۽ قانوني گهرجن موجب شامل ٿيڻ جا دستاويز تيار ڪري صحيح ڪندا. مصر، پاڪستان ۽ متحده عرب امارات اڳ ئي شامل ٿيڻ جو اعلان ڪري چڪا آهن.
پرڏيهي وزيرن آمريڪي صدر ڊونلڊ ٽرمپ جي دعوت جي آجيان ڪندي سندس قيادت ۾ امن لاءِ ڪيل ڪوششن جي حمايت ڪئي. گڏيل پڌرائي ۾ اهو به چيو ويو آهي ته سڀئي ملڪ بورڊ آف پيس جي مشن تي مڪمل تعاون ڪندا.
پڌرائي موجب هي مشن غزه تڪرار جي خاتمي لاءِ جامع منصوبي تحت هڪ عبوري انتظاميه طور ڪم ڪندو، جنهن جي توثيق گڏيل قومن جي سلامتي ڪائونسل جي قرارداد 2803 ذريعي ڪئي وئي آهي.
بورڊ آف پيس جو مقصد مستقل جنگبندي کي مضبوط ڪرڻ، غزہ جي نئين سر تعمير ۾ مدد ڏيڻ ۽ فلسطيني عوام جي حقِ خوداراديت ۽ رياست جي قيام جي بنياد تي منصفاڻي ۽ پائيدار امن کي هٿي ڏيڻ آهي.
پرڌرائي ۾ اميد ظاهر ڪئي وئي آهي ته عالمي قانون موجب کنيل قدمن سان خطي جي سڀني ملڪن ۽ عوام لاءِ امن، سلامتي ۽ استحڪام جي راهه هموار ٿيندي.
