ڪراچي (ويب ڊيسڪ) پاڪستان جا ايران ۽ متحده عرب امارات سان سفارتي ۽ معاشي لاڳاپا ڏينهن به ڏينهن وڌيڪ مستحڪم ٿي رهيا آهن۔
پرڏيهي آفيس موجب نائب وزيراعظم ۽ پرڏيهي وفاقي وزير سينيٽر محمد اسحاق ڊار سان اسلامي جمهوريه ايران جي پرڏيهي وزير سيد عباس عراقچي جي ٽيليفونڪ ڳالهه ٻولهه ٿي، جنهن ۾ ٻنهي اڳواڻن خطي ۽ عالمي سطح تي جاري اهم اڳڀرائي بابت تفصيلي خيالن جي ڏي وٺ ڪئي۔
ايراني پرڏيهي وزير جنيوا ۾ گڏيل قومن جي انساني حقن واري ڪائونسل ۾ ايران بابت قرارداد تي پاڪستان جي اصولي موقف، ووٽنگ جي مطالبي ۽ قرارداد جي مخالفت ۾ ووٽ ڏيڻ تي نائب وزيراعظم ۽ پرڏيهي وزير جو شڪريو ادا ڪيو۔ هن وزيراعظم محمد شهباز شريف، حڪومت پاڪستان ۽ عوام لاءِ به پنهنجي گہري قدرداني ۽ تشڪر جو اظهار ڪيو۔
ان کان علاوه نائب وزيراعظم ۽ پرڏيهي وزير سينيٽر محمد اسحاق ڊار دبئي ۾ متحده عرب امارات جي اعليٰ حڪومتي ۽ ڪاروباري اڳواڻ، جاسم محمد بو عطابه الزعابي سان ملاقات ڪئي، جيڪو ابوظبي ڊپارٽمينٽ آف فنانس جو چيئرمين، سپريم ڪائونسل براءِ مالي ۽ اقتصادي امور جو سيڪريٽري جنرل، اتصالات جو چيئرمين ۽ ابوظبي هولڊنگ ڪمپني جو وائس چيئرمين آهي۔
ملاقات ۾ پاڪستان ۽ متحده عرب امارات جي وچ ۾ تاريخي ڀائيچاري لاڳاپن، گڏيل اعتماد ۽ تعاون کي ٻه طرفي ڀائيواري جي مضبوط بنياد قرار ڏنو ويو۔ ان موقعي تي ٻنهي ڌرين پاڪ-يو اي اي واپار ۽ اقتصادي تعاون جو جائزو به ورتو۔
ملاقات ۾ پاڪستان ۾ يو اي اي جي سيڙپڪاري وڌائڻ جا امڪان غور هيٺ آيا ۽ اتصالات جي پاڪستان ۾ جاري سيڙپڪاري، خاص طور تي پاڪستان ٽيلي ڪميونيڪيشن ڪمپني لميٽيڊ (پي ٽي سي ايل) ۾ ان جي شيئرز بابت به تفصيلي ڳالهه ٻولهه ٿي۔
نائب وزيراعظم ۽ پرڏيهي وزير حڪومت پاڪستان جي عزم کي اجاگر ڪيو ته خانگي شعبي ۽ ڀائيوار ملڪن جي سيڙپڪاري ۾ سهولت فراهم ڪئي ويندي ۽ ٻنهي ڀائيچاري ملڪن جي وچ ۾ اقتصادي ۽ واپاري لاڳاپا وڌيڪ مضبوط ڪيا ويندا۔ هن پي ٽي سي ايل سان لاڳاپيل ديرين مسئلن جي بروقت حل ۽ مستقبل جي ترقي لاءِ ويجهي تعاون جي ضرورت تي زور ڏنو۔
جاسم محمد بو عطابه الزعابي پاڪستان ۾ سيڙپڪاري جي واڌ، موجوده مسئلن جي حل ۽ گڏيل مقصدن جي حصول لاءِ مڪمل تعاون ۽ عزم جو اعاده ڪيو۔ ٻنهي ڌرين قيادت جي رهنمائي مطابق زير التوا معاملن جي جلد حل ۽ واپار، سيڙپڪاري ۽ گڏيل منصوبن جا نوان موقعا پيدا ڪرڻ تي اتفاق ڪيو۔
ملاقات ۾ پاڪستان جي طرفان متحده عرب امارات ۾ سفير شفقت علي خان، ٽريڊ ڪائونسلر علي زيـب، قائم مقام قونصل جنرل فواد علي خان ۽ ٿرڊ سيڪريٽري فراز ارشد موجود هئا، جڏهن ته يو اي اي جي طرفان اتصالات يو اي اي جو سي اي او مسعود محمد شريف موجود هو۔
