اسلام آباد(ويب ڊيسڪ) ناڻي واري وفاقي وزير محمد اورنگزيب چيو آهي ته سرڪاري ادارن ۾ ڪرپشن سبب هر سال لڳ ڀڳ هڪ هزار ارب رپيا ضايع ٿيندا هئا، جنهن ڪري يوٽيلٽي اسٽورز، پي ڊبليو ڊي ۽ پاسڪو کي بند ڪيو ويو.
پاڪستان پاليـسي ڊائلاگ ۾ خطاب ڪندي وزير خزانه ٻڌايو ته حڪومت جو سڀ کان وڏو خرچ قرضن تي سود جي ادائيگي آهي، پر گذريل سال 850 ارب رپيا بچت ڪئي وئي ۽ هن سال به بچت جو امڪان آهي. هن چيو ته ڍانچاتي سڌارا، ايف بي آر جي ٽرانسفارميشن ۽ توانائي شعبي ۾ سڌارا جاري آهن.
محمد اورنگزيب ٻڌايو ته گذريل مالي سال ترسيلات زر 38 ارب ڊالر رهيون، جڏهن ته هن سال 41 ارب ڊالر کان وڌڻ جي اميد آهي. پي آءِ اي جي نجيڪاري ۾ مقامي سيڙپڪار به شامل ٿيا ۽ 24 ادارا نجيڪاري ڪميشن حوالي ڪيا ويا.
هن اعلان ڪيو ته حڪومت ايندڙ ٻن هفتن ۾ پانڊا بانڊز لانچ ڪندي، جڏهن ته هڪ سروي موجب 73 سيڪڙو سيڙپڪار پاڪستان ۾ سيڙپڪاري لاءِ پراميد آهن. وڏي صنعتن جي ڪارڪردگي مثبت رهي آهي ۽ نجي شعبي کي قرضن جي فراهمي 1.1 ٽريلين رپيا تائين پهچي وئي آهي. اسٽاڪ مارڪيٽ ۾ 18 مهينن دوران 41 سيڪڙو واڌ ۽ 1.35 لک نوان سيڙپڪار شامل ٿيا آهن.
وزير خزانه چيو ته پاڪستان وٽ دنيا جي ٽين وڏي فري لانسر فورس موجود آهي ۽ حڪومت جي ذميواري آهي ته نوجوانن کي پليٽفارم فراهم ڪري. هن خبردار ڪيو ته 2047 تائين 3 ٽريلين ڊالر جي معيشت بڻجڻ لاءِ آبادي تي ضابطو ضروري آهي، ڇو ته ساليانو 2.55 سيڪڙو واڌ ترقي لاءِ نقصانڪار آهي.
هن ٻڌايو ته عالمي ريٽنگ ايجنسين سڌارن تي اعتماد ظاهر ڪيو آهي ۽ آءِ ايف سي 3.5 ارب ڊالر جي سيڙپڪاري مڪمل ڪئي آهي. ريڪوڊڪ منصوبي تحت 2028 ۾ برآمدات شروع ٿينديون ۽ پهرين سال ۾ 2.8 ارب ڊالر جي برآمدات جو امڪان آهي.
نجڪاري واري صلاحڪار محمد علي چيو ته ماضي جي غلط پاليسين نجي سيڙپڪاري کي نقصان پهچايو، جڏهن ته نجڪاري مارڪيٽ جي خرابي درست ڪرڻ جو طريقو آهي. مصدق ملڪ چيو ته خوشحالي جو سرچشمو تعليم، هُنر ۽ پيداوار آهي، پر اشرافيه کي نوازڻ واري پاليسي معيشت کي ڪمزور ڪيو آهي.
وزير منصوبابندي احسن اقبال چيو ته پاڪستان ايٽمي قوت هجڻ سان گڏ جي ايف-17 جهاز وڪرو ڪري رهيو آهي، ٽريڪٽر سازي، آٽوموبائل ۽ انجنيئرنگ شعبي ۾ به ترقي ٿي آهي، پر عالمي مقابلي لاءِ وڌيڪ محنت جي ضرورت آهي.
