ڪراچي (ويب ڊيسڪ) ذريعن موجب مختلف تنازعات ۾ گهيريل مونس علوي پنهنجو استعيفو ڪمپني جي بورڊ آف ڊائريڪٽرز کي موڪلي ڇڏيو آهي، جڏهن ته نئين سي اي او جي مقرري لاءِ تياريون شروع ٿي چڪيون آهن.
ڪي-اليڪٽرڪ جي ترجمان مونس علوي جي استعيفي بابت تصديق يا ترديد ڪرڻ کان انڪار ڪيو آهي. ذريعن جو چوڻ آهي ته بورڊ جي منظوري کان پوءِ پاڪستان اسٽاڪ ايڪسچينج کي به آگاهه ڪيو ويندو.مونس علوي 18 سال تائين ڪي-اليڪٽرڪ ۾ خدمتون سرانجام ڏنيون ۽ 8 سال تائين سي اي او جي حيثيت سان ڪم ڪندي سڀ کان ڊگهي عرصي تائين سي اي او رهڻ جو رڪارڊ قائم ڪيو.
ذريعن موجب بورڊ آف ڊائريڪٽرز جي چيئرمين مارڪ اسڪيليٽن استعيفيٰ منظور ڪري ڇڏي آهي، جڏهن ته نئين سي اي او لاءِ ڪراچي سان تعلق رکندڙ ٽن اميدوارن کي شارٽ لسٽ ڪيو ويو آهي، جيڪي توانائي ۽ فنانس شعبي ۾ وسيع تجربو رکن ٿا.
بورڊ جو اهم اجلاس ايندڙ هفتي ٿيڻ جو امڪان آهي، جڏهن ته بورڊ آف ڊائريڪٽرز جا اليڪشن رمضان المبارڪ ۾ منعقد ٿيندا. موجوده بورڊ ٽن شارٽ لسٽ ٿيل اميدوارن جا انٽرويو وٺي نئين بورڊ کي رپورٽ پيش ڪندو.
ذريعن ٻڌايو ته بورڊ جي مجموعي ميمبرن جو انگ 13 آهي، پر ڊگهي عرصي کان 3 سيٽون خالي آهن. مونس علوي جي استعيفي کان پوءِ موجوده ميمبرن جو انگ 9 رهجي ويو آهي.
استعيفي کان پوءِ ڪي اليڪٽرڪ ۾ غير يقيني صورتحال پيدا ٿي وئي آهي ۽ اعليٰ آفيسر مستقبل بابت پريشان نظر اچن ٿا. مونس علوي هن وقت عمري لاءِ سعودي عرب ۾ موجود آهي، جتي رابطو ڪرڻ باوجود هن فون نه کنيو ۽ نه ئي ڪنهن پيغام جو جواب ڏنو. ترجمان جو چوڻ آهي ته ڪمپني جي هدايت موجب ئي سرڪاري موقف جاري ڪيو ويندو.
