پشاور(ويب ڊيسڪ) وزيراعليٰ خيبرپختونخوا سهيل آفريدي چيو آهي ته اقتدار هميشه لاءِ نه هوندو، اڄ اوهان جي باري آهي، سڀاڻي اسان جي هوندي، ۽ هر ظلم جو حساب ورتو ويندو.
جمرود ۾ گورنمينٽ ڪاليج آف انجنيئرنگ اينڊ ٽيڪنالاجي جي اپلائيڊ سائنسز جي اپ گريڊشن تقريب کي خطاب ڪندي سهيل آفريدي چيو ته جمرود کي ڄاڻي واڻي ترقي کان پٺتي رکيو ويو، پر هاڻي تعليم جي ميدان ۾ عالمي سطح تي ترقي ڏني ويندي. هن چيو ته عمران خان جي وژن موجب انسانن تي سيڙپڪاري ڪئي ويندي، ماضي ۾ نوجوانن کي بندوق سيکاريو ويو، هاڻي قلم جي ذريعي بااختيار بڻايو ويندو.
وزيراعليٰ چيو ته قومي ميڊيا خيبرپختونخوا جي عوام کي پنهنجو نه ٿو سمجهي، اربين رپيا هڙپ ڪندڙن جو احتساب نه ٿو ٿئي، پر جڏهن هن وادي تي راهه متاثرن لاءِ 4 ارب رپيا جاري ڪيا ته ميڊيا تي سندس خلاف مهم هلائي وئي. هن چيو ته جيڪڏهن قومي ميڊيا سچ نه ٿو ڏيکاري ته گهٽ ۾ گهٽ ڪوڙو به نه ڏيکاري.
سہيل آفريدي چيو ته باني پي ٽي آءِ سان ملاقات لاءِ آئيني قدم کنيا ويا پر اجازت نه ڏني وئي، جيڪڏهن قانوني تقاضا پوري ڪرڻ باوجود ملاقات نه ٿي ڏني وڃي ته احتجاج ڪيو ويندو. هن چيو ته عمران خان ۽ بشريٰ بي بي کي ناحق قيد ڪيو ويو آهي، بنيادي حقن جي لتاڙي ٿي رهي آهي، ۽ هڪ صوبائي وزيراعليٰ کي بار بار اڊياله جيل وڃڻ کان روڪيو ويو.
هن وڌيڪ چيو ته جيڪڏهن وزيراعليٰ سان اهڙو رويو آهي ته عوام سان ڇا ٿيندو؟ آئيني ۽ قانوني رستا آزمايا ويا پر شنوائي نه ٿي، هاڻي پرامن احتجاج ئي واحد آپشن آهي. سهيل آفريدي چيو ته خيبرپختونخوا جا نوجوان پنهنجن حقن لاءِ اٿن، عوام جي مفاد خلاف هر پاليسي جي مخالفت ڪئي ويندي.
تقريب ۾ هن ضم ٿيل ضلعن جي سڀني ڪاليجن لاءِ مفت ٽرانسپورٽ سروس جو اعلان ڪيو ۽ ٻڌايو ته جمرود ۾ آرٽيفيشل انٽيليجنس، ڊيٽا سائنس، روبوٽڪس ۽ سافٽ ويئر انجنيئرنگ پروگرام شروع ڪيا پيا وڃن. صوبائي حڪومت جديد تعليم ڏانهن قدم کڻي رهي آهي، ۽ ڪاليجن ۾ پهريون ڀيرو اسٽيٽ آف دي آرٽ ليبز ۽ لائبريريون قائم ڪيون پيون وڃن.
وزيراعليٰ سهيل آفريدي چيو ته حڪومت نوجوانن کي بندوق نه پر قلم جي ذريعي بااختيار بڻائڻ چاهي ٿي، جديد سائنس ۽ ٽيڪنالاجي کانسواءِ عالمي ترقي جو مقابلو ممڪن ناهي.
