ڪوهاٽ(ويب ڊيسڪ) شکردرہ روڊ تي پوليس موبائل تي نامعلوم دهشتگردن طرفان حملو ڪيو ويو، جنهن ۾ ڊي ايس پي لاچي اسد محمود سميت 5 اهلڪار شهيد ٿي ويا، جڏهن ته ڪيترائي زخمي ٿيا.
ڊي پي او ڪوهاٽ موجب پوليس ٽيم هڪ گرفتار جوابدار کي کڻي وڃي رهي هئي ته اوچتو دهشتگردن فائرنگ شروع ڪئي. مقابلي دوران 2 گرفتار جوابدار به مارجي ويا. شهيدن ۾ انسپيڪٽر انارگل خان، هڪ گن مين، ريڊر ۽ ڊرائيور شامل آهن. زخمي اهلڪارن کي اسپتال منتقل ڪيو ويو آهي.
پوليس جي بيان مطابق دهشتگردن حملو ڪرڻ بعد پوليس موبائل کي باهه ڏئي فرار ٿي ويا. واقعي کان پوءِ علائقي ۾ خوف ۽ ڏهڪاءُ پکڙجي ويو، جڏهن ته پوليس جي وڏي نفري پهچي سرچ آپريشن شروع ڪيو. اضافي نفري به متاثر علائقي ۾ رواني ڪئي وئي آهي.
وفاقي گهرو وزير محسن نقوي، گورنر خيبرپختونخوا فيصل ڪريم ڪنڊي ۽ وزيراعليٰ سهيل آفريدي واقعي جي سخت مذمت ڪئي آهي. محسن نقوي چيو ته شهيدن جي خاندانن سان هن ڏکئي گهڙي ۾ گڏ آهيون. وزيراعليٰ سهيل آفريدي چيو ته شهيدن جو رت رائيگان نه ويندو، خيبرپختونخوا پوليس دهشتگردي خلاف پهرين دفاعي لڪير آهي، جنهن جون قربانيون ساراهه جوڳيون آهن.
اهو واقعو هڪ ڀيرو ٻيهر ثابت ڪري ٿو ته دهشتگردي خلاف جنگ ۾ پوليس جا جوان سڀ کان اڳتي آهن ۽ پنهنجي جانين جو نذرانو پيش ڪري رهيا آهن.
