ڊي آءِ خان (ويب ڊيسڪ) خيبرپختونخوا جي ضلعي ڊيره اسماعيل خان ۾ دهشتگردن وانڊه بڊھ پوليس تي فائرنگ ڪئي، جنهن جي نتيجي ۾ ايس ايڇ او سميت 4 پوليس اهلڪار شهيد ٿي ويا.
پوليس موجب ايس ايڇ او ٿاڻو پنياله فهيم ممتاز شهيد ٿي ويا، جڏهن ته ٻين اهلڪارن به جان جو نذرانو پيش ڪيو. اطلاع ملندي ئي پوليس جي وڏي نفري واقعي واري هنڌ پهچي وئي. پوليس ٻڌايو ته حملي ۾ ڊي ايس پي پهاڙپور حافظ محمد عدنان سخت زخمي ٿي پيو.
گورنر خيبرپختونخوا فيصل ڪريم ڪنڊي ڊيره پوليس تي حملي تي افسوس جو اظهار ڪيو ۽ رپورٽ طلب ڪئي. هن چيو ته ڊي ايس پي حافظ عدنان ۽ ٻين آفيسرن تي حملو انتهائي افسوسناڪ آهي، جڏهن ته ايس ايڇ او فهيم ممتاز ۽ ٻين اهلڪارن جي شهادت تي دل ڏکوئيندڙ آهي. گورنر زخمين جي علاج لاءِ هدايتون جاري ڪيون ۽ سندن جلد صحتيابي لاءِ دعا ڪئي.
وزيراعليٰ خيبرپختونخوا محمد سهيل آفريدي به واقعي جي سخت مذمت ڪئي. هن چيو ته شهيد اهلڪارن جي قرباني کي سلام پيش ڪريون ٿا ۽ وارثن جي غم ۾ برابر جا شريڪ آهيون. صوبائي حڪومت متاثر خاندانن کي هر ممڪن سهڪار فراهم ڪندي.
سهيل آفريدي چيو ته خيبرپختونخوا پوليس دهشتگردي خلاف فرنٽ لائن تي آهي، بزدلانه حملن سان پوليس جا حوصلو پست نه ٿيندا. هن زور ڏنو ته دهشتگردي جي مڪمل خاتمي لاءِ جامع حڪمت عملي ضروري آهي. وزيراعليٰ وڌيڪ چيو ته دهشتگردي سڄي ملڪ لاءِ گڏيل چيلنج آهي، تنهنڪري امن دشمن عنصرن خلاف ڪارروائيون وڌيڪ تيز ڪيون وينديون.
