ڪوئٽه(ويب ڊيسڪ) وزيراعليٰ بلوچستان مير سرفراز بگٽي چيو آهي ته پروپيگنڊا ذريعي بلوچ نوجوانن جي ذهن سازي ڪئي پئي وڃي، پر اسان پنهنجي قوم کي لاحاصل جنگ ڏانهن هرگز نه ڌڪڻ ڏينداسين.
بلوچستان اسيمبلي جي اجلاس ۾ خطاب ڪندي سرفراز بگٽي صوبائي سطح تي ٿيندڙ تازن دهشتگردي جي واقعن جي سخت مذمت ڪئي ۽ شهيدن جي وارثن سان مڪمل يڪجهتي جو اظهار ڪيو. هن چيو ته امن ۽ ترقي حڪومت جي پهرين ترجيح آهي، خارجي دهشتگردن جو ڪنهن به مذهب سان تعلق ناهي.
وزيراعليٰ چيو ته هو دهشتگردي جي هر واقعي جي مذمت ڪري ٿو، حڪومت امن قائم ڪرڻ لاءِ قدم کڻي رهي آهي ۽ شهيدن جي لواحقين جي ڏک ۾ برابر جي شريڪ آهي. هن وڌيڪ چيو ته سياسي ڳالهين کان ڪڏهن به انڪار نه ڪيو ويو آهي، فورسز ۽ شهرين پنهنجو مقدس رت ملڪ لاءِ قربان ڪيو آهي.
سرفراز بگٽي چيو ته دهشتگرد معصوم شهرين ۽ فورسز کي نشانو بڻائي رهيا آهن، پر اسان کين ڪنهن به صورت ۾ نه ڇڏينداسين. هن زور ڏنو ته بلوچ قوم کي لاحاصل جنگ ۾ ڌڪڻ جي هر ڪوشش ناڪام بڻائي ويندي ۽ صوبائي حڪومت امن ۽ ترقي جي سفر کي اڳتي وڌائيندي.
