اسلام آباد (ويب ڊيسڪ) بلوچستان جي شاگرد محمد سرفراز عالمي سطح تي ملڪ جو نالو روشن ڪري ڇڏيو. هن ڪيلن جي تني مان قدرتي فائبر تيار ڪري “ڊسڪور نيچرل فائبر انيشي ايٽو” ايوارڊ حاصل ڪيو.
ايوارڊ جو اعلان جرمني جي شهر فرينڪفرٽ ۾ هيم ٽيڪسٽائل جي عالمي نمائش دوران ڪيو ويو، جنهن ۾ سڄي دنيا مان 100 کان وڌيڪ تحقيقي ادارا، ڪمپنيون ۽ تعليمي ادارا شامل هئا.
محمد سرفراز جي منصوبي کي ماحولياتي اهميت ۽ تجارتي صلاحيت سبب خاص توجهه ملي. هن باصلاحيت بلوچ محقق چار سال جي محنت سان ڪيلن جي تني مان اعليٰ معيار جو فائبر تيار ڪيو.
محمد سرفراز پنهنجي اعزاز کي پنهنجي استاد ۽ بلوچستان جي نوجوانن جي نالي ڪيو. پاڪستان جي هن هونہار شاگرد جي ڪاميابي سڄي ملڪ لاءِ فخر جو سبب بڻجي وئي آهي.
