ڪوئيٽه(ويب ڊيسڪ) ڪراچي گل پلازه ۾ باهه لڳڻ واري واقعي کان پوءِ ڪوئيٽه جي پرنس روڊ تي واقع اچڪزئي پلازه ۾ به خوفناڪ باهه جو واقعو پيش آيو آهي.
فائربريگيڊ جون گاڏيون فوري طور تي روانو ڪيون ويون ۽ عملو باهه وسائڻ ۾ مصروف آهي. پوليس موجب لياقت بازار جي مارڪيٽ ۾ به باهه لڳڻ جون اطلائون مليون آهن. چيف فائر آفيسر ٻڌايو ته فائربريگيڊ جون ٽي گاڏيون پلازه ۾ لڳل باهه وسائڻ ۾ حصو وٺي رهيون آهن، جڏهن ته باهه سبب عمارت ۾ ڪرنٽ پئجي ويو ۽ ويجهو ٽرانسفارمر به متاثر ٿيو، جنهن تي حفاظتي طور علائقي جي بجلي بند ڪئي وئي.
پلازه جي بيسمينٽ مان پارڪنگ ۾ بيٺل گاڏيون ڪڍيون پيون وڃن. باهه تيزي سان پکڙجڻ سبب ويجهن عمارتن کي به خطرو لاحق ٿي ويو آهي. چيف فائر آفيسر موجب باهه شارٽ سرڪٽ جي ڪري لڳي، پلازه ۾ برتن ۽ جوتن جون دڪانون آهن ۽ ويجهو ليپ ٽاپ مارڪيٽ به موجود آهي.
فائربريگيڊ جي عملدارن موجب پنج ڪلاڪ گذرڻ باوجود باهه تي مڪمل طور ڪنٽرول نه ٿي سگهيو آهي. واپاري برادري ٻڌايو ته پلازه ۾ 200 کان وڌيڪ دڪانون آهن ۽ اها چار ماڙ عمارت آهي جنهن ۾ هڪ بيسمينٽ به شامل آهي.
ضلعي انتظاميه ۽ فائربريگيڊ جون ڏهه کان وڌيڪ گاڏيون باهه وسائڻ ۾ مصروف آهن، جڏهن ته پوليس ۽ فورسز جا اهلڪار به موجود آهن. ڊپٽي ڪمشنر ڪوئيٽه مهرالله باديني چيو ته وقت تي اطلاع ملڻ تي انتظاميه ۽ فائربريگيڊ فوري طور تي پهچي وئي هئي، پر باهه جي شدت سبب ايف سي بلوچستان ۽ پي ڊي ايم اي جون ٽيمون به طلب ڪيون ويون.
باهه تي ڪنٽرول ڪرڻ لاءِ واٽر ٽينڪر ايسوسيئيشن کان به مدد ورتي وئي آهي، جڏهن ته نقصان جو صحيح اندازو باهه تي مڪمل طور ڪنٽرول ڪرڻ کان پوءِ لڳائي سگهجي ٿو.
بعد ۾ لياقت بازار ۾ بروقت ريسڪيو آپريشن جي نتيجي ۾ باهه تي مڪمل طور ڪنٽرول ڪيو ويو ۽ ڪنهن به جاني نقصان جو اطلاع نه مليو. ريسڪيو 1122، ايف سي بلوچستان ۽ سول انتظاميه جي گڏيل آپريشن سان عمارت کي محفوظ بڻايو ويو ۽ قيمتي جانين جو تحفظ يقيني بڻايو ويو.
