ڪوئٽه(ويب ڊيسڪ) بلوچستان ۾ دهشتگردي جي انت واري کاتي (سي ٽي ڊي) خفيه اطلاع تي اهم آپريشنز ڪيا، جن ۾ مبينا مقابلي دوران 14 دهشتگرد مارجي ويا، جڏهن ته 3 اهلڪار زخمي ٿيا.
ڪوئٽه جي علائقي درخشان ۾ هڪ انٽيليجنس بيسڊ آپريشن دوران فتنته الخوارج سان تعلق رکندڙ 8 دهشتگرد مارجي ويا، جڏهن ته مقابلي ۾ سي ٽي ڊي جا 3 اهلڪار زخمي ٿي اسپتال منتقل ڪيا ويا. ترجمان موجب دهشتگرد سرڪاري هنڌن ۽ شهري آبادي تي حملن جي منصوبابندي ۾ ملوث هئا. آپريشن دوران وڏي انگ ۾ هٿيار ۽ بارود به هٿ آيو.
ٻئي طرف بلوچستان جي ضلعي بارخان ۾ به هڪ خفيه اطلاع تي آپريشن ڪيو ويو، جنهن ۾ فتنته الهندوستان سان تعلق رکندڙ 6 دهشتگرد مارجي ويا. خوشقسمتي سان سيڪيورٽي فورسز جا سڀ اهلڪار محفوظ رهيا. دهشتگردن وٽان هٿيار ۽ تخريبي مواد هٿ ڪيو ويو.
اختيارين جو چوڻ آهي ته دهشتگردي خلاف آپريشنز جو هي سلسلو مڪمل خاتمي تائين جاري رهندو، جڏهن ته عوام کي اپيل ڪئي وئي آهي ته ڪنهن به شڪي سرگرمي جي فوري اطلاع ڏني وڃي.
