ڊي آءِ خان(ويب ڊيسڪ) خيبرپختونخوا جي ضلعي ڊيره اسماعيل خان ۾ قريشي موڙ جي ويجهو امن ڪميٽي جي سربراهه نور عالم محسود جي گهر ۾ شادي جي تقريب دوران ڌماڪو ٿيو، جنهن جي نتيجي ۾ 5 ڄڻا فوت ۽ 10 زخمي ٿي پيا۔
ريسڪيو 1122 خيبرپختونخوا جي ترجمان بلال احمد فيضي ٻڌايو ته ڊيره اسماعيل خان ۾ قريشي موڙ جي ويجهو مبينه ڌماڪي جي اطلاع تي ريسڪيو 1122 جون 7 ايمبولينسون، فائر گاڏي ۽ ڊيزاسٽر گاڏي فوري طور تي امدادي ڪارروائي لاءِ روانيون ڪيون ويون۔
هن ٻڌايو ته ريسڪيو 1122 اڃا تائين 5 فوت ٿيلن جا مڙهه ۽ 10 زخمي اسپتال منتقل ڪيا آهن ۽ ريسڪيو آپريشن جاري آهي۔
ڊيره اسماعيل خان جي ڊي پي او صاحبزاده سجاد احمد ميڊيا سان ڳالهائيندي ٻڌايو ته ڌماڪو امن ڪميٽي جي اڳواڻن جي گهر ۾ شادي جي تقريب دوران ٿيو، زخمين کي اسپتال منتقل ڪيو پيو وڃي۔ ڊي پي او ٻڌايو ته آپگهاتي بمبار جي سسي ملي وئي آهي۔
پوليس موجب ڊيره اسماعيل خان ۾ امن ڪميٽي جي ميمبر نور عالم محسود جي گهر ۾ آپگهاتي ڌماڪو ٿيو، اطلاع ملندي ئي پوليس جي وڏي نفري واقعي واري هنڌ رواني ڪئي وئي۔ پوليس ٻڌايو ته ڌماڪي وقت گهر ۾ شادي جي تقريب جاري هئي ۽ وڏي تعداد ۾ جاني نقصان جو خدشو آهي۔
ڊيره پوليس ٻڌايو ته ڌماڪي وقت امن ڪميٽي جا ڪيترائي ميمبر موجود هئا ۽ شروعاتي طور تي 5 ڄڻن جي فوت ٿيڻ جي اطلاع آهي۔
آر پي او ڊيره سيد اشفاق انور ٻڌايو ته شادي جي تقريب دوران ڌماڪو ٿيو ۽ زخمين کي اسپتال منتقل ڪيو پيو وڃي۔
خيبرپختونخوا جي وزيراعليٰ محمد سهيل آفريدي ڊي آءِ خان ۾ بم ڌماڪي جو نوٽيس وٺندي واقعي جي سخت لفظن ۾ مذمت ڪئي۔ وزيراعليٰ سهيل آفريدي ڌماڪي بابت آءِ جي پوليس کان رپورٽ طلب ڪئي ۽ زخمين کي بهترين طبي سهولتون فراهم ڪرڻ سان گڏ سيڪيورٽي ادارن کي واقعي جي فوري جاچ ۽ ذميوارن جي نشاندهي ڪرڻ جي هدايت ڪئي۔
هن چيو ته واقعو انتهائي افسوسناڪ آهي، ذميوارن کي سزا ڏني ويندي، صوبائي حڪومت شهيدن جي وارثن جي غم ۾ برابر جي شريڪ آهي ۽ هر ممڪن مدد فراهم ڪئي ويندي۔ وزيراعليٰ سهيل آفريدي شهيدن جي درجات بلندي ۽ زخمين جي جلد صحتيابي لاءِ دعا ڪئي۔
